Shillong, K’lyngkot 28
U Bah Starfingjove Langpen Pdahkasiej uba dei u kyrtong ka Hill State Peoples’ Democratic Party (HSPDP) napoh ka 12-Mawsynram Konstitwensi u la ong ba lada ki paidbah ki ailad bad pynjop ïa u kum u MDC ha kane ka ilekshon, ka thong jong u ka long ban peit bad khmih ïa ki 28 tylli ki Hima ki bym pat don ïa la ki jong ki aiñ.
Haba kren sha ki lad pathai khubor hadien ba la pyndep ka jingthep kyrteng u Bah Starfing u la ong ba ki hima ki dei ban don noh ïa la ki jong ki aiñ kaba kynthup ruh ïa ka Mawsynram Syiemship namar haba ym don ki aiñ hapoh ki Hima, ka rukom synshar-khadar hapoh ki Hima kam long kaba bit-ba biang.
“Ka thong jong nga haba nga ïakhun ïa ka ilekshon MDC ka long ba ngan peit ba ki It-ki Hima kiba don hapoh ka KHADC ki dei ban don noh ïa la ki jong ki aiñ namaba kumba ngi tip, ngi don 54 tylli ki It-ki Hima bad napdeng kine, 22 tylli ki la don ïa la ki jong ki aiñ, 4 tylli ki dei kiba don hapdeng ka jingpeit u Lat ban ïoh ïa ka jingmynjur bad 28 tylli ki dei ki Hima kiba dang sah. Hapoh ka 12-Mawsynram konstitwensi, ki don 6 tylli ki Hima ki bym pat don ïa la ki jong ki aiñ”, ong u Bah Starfing.
U la pynpaw ruh ïa ka jingbym sngewhun halor ka jingpyntreikam ïa ka Khasi Hills Autonomous District (Khasi Social Custom of Lineage) Act, 1997, ha kaba ha kane ka aiñ ka la don ka jingpyndonkam ïa ka kyntien ‘Register’ ne kaba mut ‘pynrung kyrteng’ bad kaba la mih ruh ka jingpyrshah na ka UDP bad HSPDP hynrei na ka liang ka NPP ha ka jingïatreilang bad ka Congress hapoh ka KHADC, ki la mynjur ïa kane ka aiñ.
U la ong ba lada ka HSPDP ka wan ha ka bor hapoh ka District Council, ka thong jong ka seng ka long ban pynkylla ïa kane ka aiñ namarba ïa ki kur-ki jait ym dei ban rejistar hynrei ki dei ban pynithuh ïalade hapoh ka District Council bad ong ba ka Kur kam dei ka khyndew ne ka kompeni ne ka kynhun ba hap ban pynrung kyrteng.
“Na ka liang ka HSPDP ka kren shai ba ynda ngi la jop ïa kane ka ilekshon MDC, ngin wanrah ïa ka jingpynkylla namar naduh katei ka por hi, ngi la wanrah ka jingpynshai ba ym dei ban rejistar ïa ki Kur hynrei ngi donkam ban leit pynithuh ïa ki Kur hapoh ka District Council khnang ba ki District Council kan tip katno tylli ki kur-ki jait ki don hapoh u pud-u sam jong ka”, ong u Bah Starfing.
