Shillong, K’lyngkot 28
U Bah Kris Kharsati uba dei u kyrtong shimet napoh ka 6-Sohryngkham Konsti-twensi uba la mih biang shakhmat ban aireng ha ka ilekshon MDC ka ban sa long ha ka 21 tarik Rymphang, 2025 u la ong ba ka jingmih shakhmat ka dei lyngba ka rai jong ki paidbah.
Haba kren sha ki lad pathai khubor ha ka Sngi Ba-ar u Bah Kris u la ong, ka jingmih biang jong u ban ïakhun ïa ka MDC ka dei ka jingshaniah jong ki paidbah bad ka jingthmu jong u ka long ban trei hok na ka bynta ka bha-ka miat jong ki paidbah ka thaiñ baroh kawei wat lada u lah shah rem noh ha ka sien banyngkong ba u la ïakhun ïa ka ilekshon MDC ha u snem 2019.
U la ong ba kum u kyrtong u ba mih na ka United Democratic Party (UDP) um shym kynnoh ba ka dei na ka daw jong ka jingshah rem ka seng hynrei ka dei ka jingtwad jingmut jong u na ki paidbah kaba pynlong ïa u ba un aireng kum u kyrtong shimet kaba long da ka jingrai jong ki paidbah hi ym da ka rai jong u shimet.
“Ngi don ka jingkyrmen ha kane ka sien kaba mynta namar ngi ïohi ba ki paidbah ki ai shisha ïa ka jingkyrshan na ka bynta jong ngi bad na kata ka daw, ngan sa long shlur ban mih ban ïakhun ïa kane ka ilekshon bad nga kyrmen ruh kumba nga don ïa ka mynsiem ban trei, u paidbah ruh un ïohi ïa kata bad khlem artatien ngin poi sha ka thong”, ong u Bah Kharsati.
Shuh-shuh, haba phai sha ki mat ba donkam hapoh ka District Council, u Bah Kris u la ong, lada u poi ha ka thong jong ka jingjop, un ïaleh ban pynbeit ïa ki rukom thungkam-thungjam namarba bunsien la ïohi ba ka jingthep kam thep jam kam long shuh kaba shai khnang ba kan wanrah ïa ka jingmyntoi na ka bynta ki khun samla kiba wad kam wad jam bad ong ruh ba lada ki aiñ ki donkam ban pynkhlaiñ shuh shuh, un ïaleh ban wanrah ïa ki aiñ kiba thymmai.
Katba u kyrtong ka KHNAM na ka 17-Laitumkhrah-Malki, u Bah Peter Shallam, uba la dep ban ïakhun ruh ha ka ilekshon MP sha Lok Sabha ha u snem 2024 kum u kyrtong shimet, u la ai khublei ïa ki nongïalam ka seng kiba la ibit ïa u ban long kum u kyrtong jong ka seng.
Haba kren bad ki lad pathai khubor hadien ba la dep thep kyrteng u la ong, kum uwei napdeng ki kyrtong ki ban ïakhun ha ka ilekshon, u ïohi ba ka KHADC ka dei ban phaikhmat sha ki dong bad ki thaiñ ha nongkyndong namar kiba bun na ki briew ki dei kiba wan na ki longïing-longsem kiba duna ha ka ïoh-ka kot.
“Ka KHNAM ka don ïa la ka jong ka nongrim bad ngi leit sha ki paidbah ruh ym kum kiwei kiba leit ïalap ilekshon hynrei ngi leit ban pynkhreh da kumwei pat ban pynsngewthuh ïa ka KHADC bad ïa kata ka khyrnit ba hynriew kaba long ka atiar kaba khlaiñ jong ka District Council”, ong u Bah Peter.
U la bynrap da kaba ong ba bun ki nongshong shnong ha ki thaiñ nongkyndong ki la duh noh ïa la ki jong ki jaka puta da kaba buh ruh ïa ki mat kum ka jingpynneh ïa ka umbam-umdih nalor kiwei-kiwei ki mat.
