MSL 2024: Lyngba ka tie-breaker pynliem ka SLFC ïa ka R. Shkenshynriah

Ka jingïoh ïa kane ka penalty ka la wan urlong lyngba ka jingkum pyndei kti hapoh box ïa ka bol da uwei na ki rangïalehkai ka Lajong.

Wahïajer, K’lyngkot 28

Ka Shillong Lajong ka la lah ban pynliem noh ïa ka Rymbai Shkenshynriah lyngba ka tie-breaker da 4-3 kol bad ban jam sha ka final ha ka Meghalaya State League 2024 ba la pynïaid da ka Meghalaya Football Association.

Kane ka kynhun ka la khmih lynti ban rah biang ïa ka nam lahduh ha ka sien kaba ar jong kane ka lympung, ha kaba kan ïakynduh final pyrshah ïa ka Mawlai SC ha ka Sngi Saitjaiñ (1 tarik u Rymphang) ha Wahïajer Multipurpose Sports Complex.

Haduh ka por ba la buh kine ki kynhun ki la ïakhaid mar 1-1 kol bad namar bym don ba lah ban ïoh ïa ka jingjop la hap ban pynjlan sha ka extra time kaba mar 15 minit. Ha kane ka jingïakhun semi final kaba ar kaba long ha Wahïajer, ki paidbah kim shym la khih na ka jaka shong namar ki thrang dik-dik mano ban long ka nongjop.

Hapdeng kane ka jingïakhun, ka Lajong ka la ïoh ban pynkhih jar ha ka minit kaba 84 lyngba ka free-kick ba la shut da u Ïohborlang L. Lyngkhoi. Hynrei shwa ba ka Lajong kan pynthikna ïa ka jingjop, ka Rymbai Shkenshynriah na East Jaiñtia Hills ka la lah ban pynphai kylla lyngba ka penalty ba la shut da u Niwan-o Bareh ha ka minit kaba 87. Ka jingïoh ïa kane ka penalty ka la wan urlong lyngba ka jingkum pyndei kti hapoh box ïa ka bol da uwei na ki rangïalehkai ka Lajong.

Kumba ka paw kane ka long ka sien kaba nyngkong eh ba ki rangïalehkai ka Rymbai Shkenshynriah ki la lah ban pynpaw ïa ka jingtbit ha ka kylla step. Kine ki rangïalehkai ki la lah ban khanglad na ka jingshah thep bad khamtam eh u rangapkol u Livingstar Swer na ki jingpyrshang u Deibormame Tongper.

Naduh ka minit kaba 20, ka Lajong ka la ïakhun tyngeh na ka bynta ban ïoh thep kol, hynrei ka Rym-bai Shkenshynriah kaba la ïoh ka jingshah hikai ha u rangïalehkai barim ka Jylla u Marlangki Suting, kam shym la ailad ban shah thep kol ha ka liang pyrshah.

Kumba ka paw ka Lajong hapoh ka jingïalam u Bah Bobby L. Nongbet ka la lah ban ïalehkai tang shiteng madan, hynrei kam shym la lah ban pynurlong na ka daw ka jingbym don ki rangthep kol kiba kynsai wat la ka la ïoh ïa bun tylli ki kabu ksiar.

Kumba ka paw ka jingïakhun final ha kane ka kynti kaba mynta kan dei da ki kynhun ïalehkai kiba na ka nongbah Shillong bad kiba ïashim bynta ha ka Shillong Premier League. Te kumta ka Mawlai ka la khmih lynti ban rah ïa ka nam jop kaba nyngkong ha ka MSL, katba ka Lajong pat ka la khmih lynti ban rah biang sa shisien pat ïa ka trophy naduh ba ka la rah teng ha u 2019.