Shillong, K’lyngkot 28
U MLA ka Bharatiya Janata Party (BJP) na South Shillong, Bah Sanbor Shullai u la ong ba um salia wat ïa u Myntri Rangbahduh ka ri lane ki Myntri Rangbah ka Jylla jongno-jongno ruh ha kaba ïadei bad ka jingthmu khang bam don masi.
Haba kren ha ka jingïalang kaba la long ha Upper Lumparing ha ka Sngi Saitjaiñ u la ong, “Ha kaba ïadei bad ka jingbam doh masi, ym don mano-mano ruh ba lah ban khang ïa ka bam jong ngi, katba ngi mon. Ngam salia wat ïa u Prime Minister lane Chief Minister jongno-jongno ruh”.
U la ong shuh shuh ba ha kane ka Jylla, ki paidbah ki bam wat ïa ki ‘ñianglong, ‘ñiangryndia, ka khnai. U la ong ba lada khang ïa ka rukom bam un dei uba nyngkong duh ban ïakhun, bad um salia lada dei mano-mano ruh.
U MLA ka BJP u la ong ruh, haba trei pat na ka bynta ka roi ka par ym dei ban leh shongshit.
“Hapoh shnong hapoh thaw haba ngi ïatrei na ka bynta ka roi ka par, ngi ïatrei jai-jai ngim ïaleh ban shu shongshit”, la ong u Bah Sanbor.
Kham mynshwa u Bah Sanbor u la pynpaw ka jingbitar haba kylli halor ka jingkhang jong ka Sorkar Assam ba ïalam da ka BJP, kaba la khang ban khawai doh masi ha ki jaka paidbah, kynthup ha ki ïew ki hat bad ki ïing-basa ha katei ka Jylla.
U la ong ba ka Jylla Meghalaya ka dei ka Jylla kaba laitluid, bad kaba lah ban bam katba mon, ha kaba u la buh jingkylli ruh, balei hi ban khang ïa ka rukom bam?
“Hangne ha Meghalaya ka dei ka mon jong phi. Phi kwah ban bam bseiñ, phi kwah bam doh masi, bam ‘ñianglartham, bam khñiang, katba ngi mon ngin bam beit”, la ong u Bah Sanbor ha kato ka por.
U Nongïalam ka BJP u la ong ruh ba hangne hapoh ka Jylla Meghalaya da lei-lei kan ym don ka jingkhang bam doh masi, khamtam katba don hi u Bah Sanbor.
Lah ban pynpaw ruh ba halor kane ka jingkren jong u Bah Sanbor, la don ruh kiba shna jingrwai kaba la pynshong shit bad saphriang bha ha ki lad pathai social media.
