Shillong, K’lyngkot 28
Ka jingïalang plie ïa ka lympung ïalehkai 38th National Games ka la long kaba itynnad bad kaba iphuh-iphieng ha ka Sngi Ba-ar ha Uttarakhand ha kaba la wan shim bynta da kumba 10,000 ngut ki nongïalehkai na kylleng ki jylla jong ka ri ha ki 32 tylli jait jingïalehkai.
Ïa kane ka lympung ïalehkai ka ban neh haduh 17 sngi kynthih, la wan ban plie da u Myntri Rangbahduh ka ri u Narendra Modi ryngkat ka jingïadon lang u Myntri Rangbah ka Uttarakhand u Pushkar Singh Dhami.
Ha kane ka sngi plie ki la don kumba 25,000 ngut ki paidbah kiba la wan ban sakhi da la ki jong ki khmat ïa kane ka lympung ha ka Rajiv Gandhi International Cricket Stadium wat hapdeng ka jingkhriat ka suiñbneng.
Kitei 32 tylli ki jingïalehkai ki kynthup ïa ka Athletics, Aquatics, Archery, Badminton, Basketball, Bowling (Lawn), Boxing, Canoeing & Kayaking, Cycling, Fencing, Football, Golf, Gymnastics, Handball (Indoor & Beach), Hockey, Judo, Kabaddi (Indoor & Beach), Kho Kho, Modern Pentathlon, Netball, Rowing, Rugby, Shooting, Squash, Table Tennis, Taekwondo, Tennis, Triathlon, Volleyball (Indoor & Beach), Weightlifting, Wrestling bad ka Wushu. Katba ki jingïalehkai ki ban shu pyni paidbah (demonstration sports) ki long ka Mallakhamb, Kalarippayattu, Rafting bad ka Yogasana.
Kiwei kiba la ïadon lang ha kane ka sngi plie ki long u Lat ka Uttarakhand u Lieutenant General Gurmit Singh, Myntri khynnah ba dei khmih ïa ka tnat ïalehkai ka Raksha Khadse lem bad ka Myntri ka tnat ïalehkai jong ka Uttarakhand ka Rekha Arya. La don lang ruh ka President jong ka Indian Olympic Association (IOA) ka PT Usha bad u khlieh ka Commonwealth Games Federation u Chris Jenkins.
Lah ban kdew ba ka jylla Meghalaya ka la phah ïa ki nongïalehkai ban shim bynta ha khyndai tylli ki jingïalehkai kiba kynthup ïa ka Shooting, Athletics, Judo, Archery, Rowing, Wushu, Aquatics, Canoeing & Kayaking bad ka Boxing.
