Gaza City, K’lyngkot:
Ka Israel ha kane ka por ka la pynbna sha ki nong Palestine, ba ki lah ban sdang leit phai biang noh sha ka thaiñ Shatei jong ka Gaza Strip, kaba la shah pynjulor ha ka thma hadien ba la iasoi ia ka jingiateh bad ka Hamas, na ka bynta ban pyllait sa ia ki 6 ngut ki nongshah rahbor jong ka Israel.
Kane ka jingiasoi hapdeng ka Israel bad ka Hamas, ka la lah ban pynneh ïa ka jingsangeh thma kaba la pynjot ïa ka Gaza Strip bad kaba la pynpoi sakma ruh jan baroh ki paid nongshong shnong jong ka nongbah Gaza. Hynrei ha kane ka por pat la ong ba kane ka jingiasoi hapdeng kitei arliang ri, ka la plie lad ïa ki jingïakylliang koidi hapoh ka jingïateh kaba thmu ban pynkut noh ïa ka jingïakynad kaba la neh mynta la palat 15 bnai.
Hynrei la ong ba ka Israel ka la khang noh pat ia ki paidbah ba bun bah jong ka Palestine ban pyndonkam ia ka surok rud duriaw ban leit phai biang sha ka thaiñ Shatei Lam Mihngi jong ka Gaza, da kaba kynnoh ba ka Hamas ka la pynkheiñ ia ka jingiateh soskular namar ba kam shym la pyllait ia ki kynthei riew paidbah kiba la shah rahbor.
