Agartala, Kyllalyngkot:
Kumba la sakhi, la ong ba ki shipai ïada khappud ki la nang pynjur ïa ka jingpahara ha ki bynta khappud India bad Bangladesh hadien ba ka la mih ka jingïakynad hadien ka jingshah thombor jong ki nongrep ha India ha ki kynhun ba pyrshah katei ka ri.
Ha kane ka jingjia la sakhi ba ka la mih ka jingïakynad kaba jur ha ka Sngi U Blei, ka 26 tarik, Kyllalyngkot ha khappud India bad Bangladesh hajan Heerachhara ha Kailashahar Sub-Division jong ka Unakoti distrik jong ka Tripura.
Ha kane ka jingïakynad ka la pynlong ïa ar ngut ki nong India, u Karim Ali bad u Zamir Ali ba kin mynsaw jur hadien ba la kynnoh ba ki la shah thombor ha ki nong Bangladesh.
Ki tyllong khubor ki ïathuh ba katei ka jingjia ka la jia hajan ka khyrdop No. 44 jong u Border Pillar No. 1843, ha kaba u Karim Ali bad u Zamir Ali kiba shong ba sah ha ka thaiñ Hirachhara ki dang leit jngoh ïa ka jaka jong ki kaba don hapoh u pud u sam ka India.
Katkum ki khubor, kine ki arngut ki la lap ïa kawei ka kynhun jong ki briew kiba dei na ka shnong Dasteki kaba ha Bangladesh kiba ot ïa ki jingthung ha ki jaka jong ki. Haba ki la pyrshah ïa kane, ka la mih ka jingïakynad kaba jur, ha kaba ka la wanrah ïa ka jingïapynibor kaba markylliang.
Ka tyllong khubor ka la ïathuh shuh shuh ba ki nong Bangladesh kiba la kynnoh ba la ïalam da u Ahaad Ali ki la thombor ïa ki nong India da ki tiar kiba nep.
“U Karim Ali, u la mynsaw jur, na ka jingshah ot noh kawei ka shympriah, katba u Zamir Ali ruh, u la mynsaw jur”, la ong ki tyllong khubor.
Ki shipai ka tnat Border Security Force (BSF) kiba don ha kane ka jaka ki la shim ïa ka jingtuklar bad pyllait im ïa ki nong India kiba la mynsaw, ïa kiba la pynkit noh mar mar sha Unakoti District Hospital.
Kane ka jingjia ka la nang pynjur shuh shuh ïa ka jingkulmar ha khappud Heerachhara, kaba la wanrah ïa ka jingsngewkhia halor ka jingshngaiñ jong ki nongshong shnong ka ri India ha ki thaiñ khappud.
