Shillong, K’lyngkot 28
U Myntri Rangbah ka Jylla, Conrad K. Sangma ha ka Lah Sngi U Blei u la ong ba ka Sorkar ka la wanrah ïa ka rukom hikai lyngba ki jingïalehkai ne ka ‘Game Based Learning’ na bynta ki khynnah hapoh ka Jylla.
Haba plie ïa ka Model Creative Learning Centre (MCLC) ha Dobakkol, Tura, u la ong, “Ka long kaba donkam ban wanrah ïa ka rukom hikai lyngba ki jingïalehkai ka ban ai lad ïa ki khynnah ban pynroi ïa ka jinglah ban sngewthuh, ban khih shane-shatai, ban pynïasoh ïalade ha ka ban sngewthuh ïa kiei-kiei bad ka jinglah ban tehlakam ïa la ki jingsngew.”
U la pyntip ba hapoh ka Early Childhood Development (ECD) Mission, yn sa pynïeng ïa ki jaka ai jinghikai na bynta ki khynnah ha kylleng ka Jylla.
Haba ai jingïaroh ïa ka ‘Mere Mentor’ bad ka Dobakkol Non Govt L.P. School kiba la ïatreilang ban sdang ïa ka MCLC, u Myntri Rangbah u la ong, “Ka Sorkar Jylla ka la bei tyngka ïa ki jingtei hynrei kan dei ka jingkitkhlieh lang jong ka seng ban pyntikna ba kan long kaba treikam”.
Ka pisa kaba T.50 lak la mynjur na ka bynta kane ka projek hapoh ka Chief Minister’s Special Development Fund (CMSDF). Kane ka dei ka ‘Pilot’ projek bad ka dei ka jingthmu ba kongsan jong u Myntri Rangbah ban kyntiew ïa ka jingpule kaba pynshong nongrim ha ki kam bad ki jingïalehkai.
Haba pyntip ba la buh hakhmat eh ïa ka ‘ECD Mission’, u la ong, “Ka long kaba kongsan ba ngin ai ïa kaba bha tam sha ki khun jong ngi bad ha ka rukom katkum ka juk stad saïan. Naduh ba kha haduh ban da dap 8 snem, ki khynnah ki mad ïa ka jingkylla kaba sted ha ka jingim jong ki, bad dei ha kane ka por ba ka jinghikai bad jingpule kaba biang kan ai lad ïa ka jabieng jong ki ban pynroi ïa ki sap ki phong, kum ka jingstad, ka rukom pyrkhat kaba jylliew bad ki sap kiba lah ban pynbeit ïa ki jingeh”.
U la pyntip ba ka Sorkar ka la shim ïa ki jingmih hadien ka jingpule ne ki ‘Learning Outcomes’ halor ka jingheh jingsan jong ki khynnah rit na ki ri kum ka Europe bad UK bad ka la wanrah ïa la ka jong ka saiñdur.
“Ngi la pyntreikam ïa ka skhim bad ngin kyntiew ïa ki Anganwadi jong ngi sha ki ‘Smart Anganwadi'”, u la bynrap.
Ha ka shnong Dura Asim kaba hap hapoh Chokpot Block, South Garo hills, ka ‘Mere Mentor’ ka la thaw ïa ka jaka ai jinghikai da kaba kyntiew kyrdan ïa kawei ka Aganwadi. Kane ka projek ka la treikam la ar snem mynta.
Kane ka jaka ka thmu ban thaw ïa ka jaka kaba shngaiñ, kaba pdiang sngewbha, bad kaba pynsngewtynnad, kaba pynshlur ïa ki khynnah ban wad bniah bad ban lah ha ka ban pule lyngba ka jingïalehkai – kaba pynlong ïa ka jingpule kaba sngewtynnad.
“Ka jingpynleit jingmut jong ka projek halor ka jinghikai kaba pynshong nongrim ha ka imlang-sahlang bad ka jingïatreilang ka lah ban ïarap ha ka ban tei ïa ka jingïadei kaba khlaiñ hapdeng ki skul, ki longïing, bad ki shnong ki thaw, ka ban ïalam pat sha ki rukom hikai kiba kham treikam bha bad kiba ïadon bynta lang,” ong u Sourav Kumar, nongseng ka ‘Mere Mentor’.
