Shillong, K’lyngkot 29
U MLA ka Bharatiya Janata Party (BJP) na South Shillong uba dei ruh Chairman ka Meghalaya Tourism Development Corporation (MTDC), Bah Sanbor Shullai uba don mynta ha Delhi u la rah bun tylli ki mat hakhmat u Myntri Khynnah ka Sorkar Pdeng ba khmih ïa ka tnat DoNER, Dr Sukanta Mazumdar.
Ki mat ba u Bah Sanbor u la rah hakhmat u Myntri Khynnah ba peit ïa ki kam Pynroi ha ka thaiñ Shatei Lam Mihngi, ki kynthup halor ka song pisa sha ki Autonomous District Council (ADC) bad ka jingpyllait biang por ïa ka bai bam ki samla pule ka Jylla.
Ha kane ka jingïakynduh, u MLA na kane ka Jylla u la kyrpad na u Myntri ban pyllait beit noh ïa ka song pisa sha district council lane ka ‘Direct Funding’ khlem da ïaid lyngba shuh na ka Sorkar Jylla.
U Bah Sanbor ha kane ka jingleit sha Delhi u la ïakren sani bha ruh bad u Dr. Mazumdar ha kaba ïadei bad ki mat bad ki projek bapher-bapher kiba dang sahteng ha Jylla.
Kawei ka mat kaba u Bah Sanbor u la ïakren bad u Myntri Khynnah ka DoNER, ka dei halor ka bai bam ki samla pule, namar kumba ka long mynta kiba bun ki samla pule hapoh kane ka Jylla ki dang shaniah ha ka bai bam ban bteng ïa ka jingpule, pynban ka bai bam ba ki dei ban ïoh kam ju biang bor, haduh ba ki don ki por ba hap ban pynlong da ki jingïakhih, bad hap ban tuklar bad dawa da ki sengbhalang.
Ha kaba ïadei bad kane ka phang, u Bah Sanbor u la ong, “Nga la kyrpad ruh na ka Sorkar Pdeng ba kan pyllait beit noh ïa ka bai bam (scholarship) ki samla ha ka por kaba biang”.
Ha kajuh ka por, u Bah Sanbor u la ïathuh ba u Myntri Khynnah un sa wan ïuh kjat sha Meghalaya hadien ba la kut ka ilekshon sha ki district council. U la pyntip ba ha kane ka jingwan, u Dr. Mazumdar un sa ïakynduh ruh ïa ki Nongïalam jong ki district council ban ïakren halor ki jingeh bad jingdonkam jong ki district council.
