Shillong, K’lyngkot 29
U kyrtong ka Voice of the People Party (VPP) na Mawkhar-Pynthorum -khrah konstitwensi, Bah Strong Pillar Kharjana u la ong ba u la pan tiket na ar tylli ki konstitwensi na bynta ban ïa aireng ha kane ka ilekshon ban wan sha ka Khasi Hills Autonomous District Council (KHADC).
Kine ar tylli ki konstiwensi ki kynthup ïa ka Mawkhar-Pynthorum-khrah bad ka Jaïaw.
“Haba ïadei bad kata, ha ka jingshisha na ka seng ngim don eiei bad haba ïadei bad ka tiket ba nga poi shatei (Maw-khar-Pynthorumkhrah) ruh kam don eiei namarba na nga hi, nga la pan tiket na baroh ar tylli ki konstitwensi bad ngi ieh ha ka jingstad jong ka seng,” ong u Bah Kharjana hadien ka jingthep kyrteng ha ka Sngi Balang ha ISBT, Mawïong na bynta ka ilekshon MDC.
“Ka seng haba ka ibit ïa nga ban ïakhun nangtei (Mawkhar-Pynthorumkhrah), nga pdiang ïa ka rai jong ka seng,” u la ong.
Haba kylli la u MLA ka North-Shillong, Bah Adelbert Nongrum u kyrshan ne em ïa u ha kane ka ilekshon ban wan, u Bah Kharjana u la ong ba haduh mynta, na ka liang u MLA u don bad un ïai don hi bad ka seng.
Halor ka jingsngew skhem ban poi sha ka thong, u la ong, “Ngan hap ïakhun bad u Bah P.N. Syiem, MDC ba mynta, hynrei ngi don hi ka jingkyrmen namar ngi mih hi na ka seng kaba ki paidbah ki la phaikhmat bad ngi don ka jingkyrmen ban poi sha kata ka thong kaba ngi angnud.”
Ha kane ka sngi, 9 ngut ki kyrtong jong ka VPP ki ban ïa aireng sha ka ilekshon MDC (KHADC) na East Khasi Hills ki la leit ban thep kyrteng ha ISBT, Mawïong.
Kine ki kynthup ïa u Bah Winston Tony Lyngdoh na Nongthymmai, Bah Eddieson Kharumnuid na Mawlai, Bah Kitbor Syiem na Nongkrem, Bah Strong Pillar Kharjana na Mawkhar-Pynthorumkhrah, Bah Denzil R. Chen na Jaïaw, Bah Lancaster Marbaniang na Mawphlang-Diengïei, Kong Aibandaplin L. Nonglait na Mylliem, Bah Seiborlang Warbah na Mawkynrew bad Bah Danny Langstieh na Laban-Mawprem.
Hashuwa, u kyrtong ka Laban-Mawprem, Bah Danny Langstieh haba kren sha ki lad pathai khubor hadien ka jingthep kyrteng u la ong ba kum ki kyrtong MDC jong ka VPP, ki buh hakhmat bad ïakhun ïa ki mat – ka thong jong ka seng.
U la ïathuh ruh ba shen ka seng lyngba ka State Executive Committee (SEC) kan sa pynmih ïa ka thup ki mat treikam jong ka.
Haba kylli, u la ong, “Kino-kino ki aiñ, ynda ngi la bat ïa u lakam ha District Council, ha kata ka por ngin sa lah ban bishar bniah, ban khmih bad pyntreikam, bad lada donkam ngin pynbha ïa kita ki aiñ.”
Shuh-shuh haba pynpaw ïa ka jingkyrmen skhem, u la bynrap, “Haba ngi la mih shakhmat kum ka seng, ka jingkyrmen lei ngi don beit haba ngi la mih madan bad khamtam ngi ïakhun na ka VPP ba baroh ki paidbah ki la phaikhmat hi sha ngi. Kum ki kyrtong baroh, ngi kular ba ngin da la poi sha ka thong, ngin ïatylli lang kawei.”
