Shillong, K’lyngkot 29
Ka Langsning FC ka la jam sha ka kyrdan kaba hynriew ha ka lympung ïalehkai Shillong Premier League 2024, hadien ba ka la lah ban pynliem noh ïa ka Nongthymmai SC da 2-0 kol ha ka Sngi Balang ha SSA Stadium kaba ha First Ground, Polo.
Kane ka nam jop ka la wan urlong lyngba ki kol ba la thep da u Rhitso Mero ha ka minit kaba 25 bad 71 na ka bynta ban pynlong ïa ka Langsning ban ïoh 14 poiñ. Ka Langsning ka la sdang ïa ka wat ba ar da kaba ïoh 7 poiñ na ki lai tylli jingïakhun. Pynban ka Nongthymmai kaba don ha ka kyrdan kaba khyndai bad haduh mynta ka la shah rem hynriew sien lynter bad ka dang ïai sah 7 poiñ bad ka don ruh ha ka jingma ban shah pynhiar kyrdan na kane lympung.
Kumba ka paw ka Nongthymmai ka la shah rem ha ka Langsning ha ka wat kaba nyngkong da 3-2 kol ha ka 23 tarik u Risaw bad mynta ka donkam ban jop khnang ban pyllait ïalade na ka jingshah pynhiar kyrdan.
Hynrei ka Langsning ka la mad ïa ka jingkylla ha ka rukom ïalehkai bad ka la lah ban pyni ïa ka jingkhlaiñ bor naduh kaba sdang. U Dauruhipaia Pale u la shut ïa ka bol ha kaba ka la leit dei na diengkol ha ka minit kaba 15, hynrei kane ka kynhun ka la lah ban pynurlong hadien shiphew minit na ka bynta ban pynkhih jar nyngkong.
U Chusrang Sangma, uba tbit bha ban thep kol, u la rah ïa ka bol hapoh ‘box’ bad u Rhitso u la thep kol da ka khlieh. Hadien shi minit, une u rangïalehkai na Nagaland u la shah khanglad noh hadien ba u la ïoh biang sa kawei ka kabu ksiar hadien ba u Mowell Chyne ka Nongthymmai u la lah ban pyllait na ka jingshah thep.
Ka Nongthymmai ka la ïoh ïa ka kabu kaba biang shwa ban kut ka jingïalehkai hadien ba u Rudolf Shadap u la rah ïa ka bol sha kol ryngkat u paralok Andyson Lapang, hynrei kim shym la lah ban thep.
Hadien katto katne por ba la bteng ïa ka jingïakhun jong ka kylla miet, u Rhitso u la ïoh ïa ka kabu kaba biang eh ha ka minit kaba 71 hadien ba u Manbhalang Nongmin u la ïoh ban rah ïa ka bol hapoh ‘box’ bad u Rhitso um shym la pynlehnohei ïa kane ka kabu ksiar.
Ha ka jingshisha ka Langsning ka la dei ban thep kol biang, hynrei u Mecheal Roy Kurbah um shym la lah ban pynurlong na ka daw ka jingïashan tyngeh u rangapkol ka Nongthymmai u Akash Thapa.
Ka jingïalehkai ha ka Sngi Palei kan long hapdeng ka Rangdajied United FC pyrshah ïa ka Ryntih FC ha ka por 2:30 nohphai sngi. Ka Rangdajied ka la jop da 3-0 kol ha ka wat kaba nyngkong kaba la long ha ka 30 tarik u Risaw 2024.
