Nongstoiñ, K’lyngkot:
Ka Joint Action Committee (JAC) jong lai tylli ki Polling Station (Misei, Langdongdai, Mawsmai) ha ka Lah Sngi U Blei jong ka taïew ka la leit ban ïakynduh ïa u Deputy Commissioner ka West Khasi Hills District ban aiti ïa ka dorkhas ban dawa pynjlan ïa ka jingpynrung kyrteng thymmai ha ki Epic na ka bynta 21 tylli ki shnong jong 3 tylli ki Polling Station.
U Bah Jeremiia Dkhar, Chairman ka JAC ki lai PS haba kren sha ki lad pathai khubor u la ong, kane ka jingkyrpad ka dei halor ka jingmynjur ka KHADC ban pynneh ïa ki 21 tylli ki shnong na 3 tylli ki PS (Misei, Langdongdai, Mawsmai) da ka Special Session jong ka KHADC myn ha ka 19.12.2024 lyngba ka Constitution of District Council (Amendment) Rules, 2024.
Shuh-shuh, u la ong ruh ba kumba ka long mynta kane ka ‘bill’ ka dang don hapoh ka tnat District Council Affairs ka Sorkar Jylla ban leh ïa kaba donkam ban ïoh ka jingmynjur na u Lat ka jylla.
Ki Nongïalam ka JAC ki la kyrpad ïa u Deputy Commissioner ka WKH ban phah ïa kane ka jingkyrpad sha ka ophis jong ka District Council Affairs ka Sorkar Jylla bad ha kajuh ka por u la kyrpad ïa u Bah Prestone Tynsong, uba dei u Myntri ba dei khmih ïa ka tnat DCA ka Sorkar Jylla ban pynkloi ban pynïoh ïa ka muhor bad ka jingmynjur na u Lat ka Jylla.
