Shillong, K’lyngkot 30
U Myntri Rangbah ka Jylla, Conrad K Sangma u la ong ba kito kiba la ïoh ïa ki license na ka sorkar India, ki la lah ban sdang noh ïa ka jingtih dewïong mynta ne lashai, katkum ka jingkloi jong ki ban pynbiang ïa ki jingdonkam.
Ha ka sngi Balang lai tylli ki soskular Escrow la ïasoi hapdeng ka Controller of Coal bad ka Sorkar India ban sdang tih noh ïa u dewïong ha ki lai tylli ki jaka, ba kynthup ha Pyndengshalang, West Khasi Hills, Saryngkham, East Jaiñtia Hills bad ha Lumiakhi Wahsarang, East Jaiñtia Hills.
Haba kren ha ka sngi Palei u Myntri Rangbah u la ong ba ka Sorkar kumba ka la kular ka la pynurlong ban ïoh ïa ka jingmynjur na ka bynta ban ïoh tih ïa u dewïong katkum ka jingstad saïan da ka jingïatreilang bad ka Ministry of Coal.
U Conrad u la pynpaw ka jingkyrmen ba da ka jingïoh ban tih dewïong noh katkum ka jingstad saïan, yn sa pyllait noh shisyndon ïa ka Jylla na ka jingtih bad shalan beaiñ ïa u dewïong.
U la ïathuh ruh ba nalor kine lai tylli, sa 12 tylli ki aplikeshon ki la don ha ka bynta ban sa ïoh noh ïa ka jingmynjur, bad na ka liang ka Sorkar kan bteng ban buddien ïa kane ka kam.
Haba kylli ba kane ka dei ka buit ban ïohnong ha ka ilekshon MDC, u Conrad u la ong, “Phi lah ban ong kumta namar ka dei shwa ka ilekshon, hynrei ïa kane la leh namar ba ki briew ki kylli, la jia aïu ïa ka kam tih dewïong”.
Haba pynpaw ba kane ka kam ban ïoh tih dewïong biang ha ka Jylla ka long kaba kyllaiñ ban ïoh ïa ka jingmynjur na ka Sorkar Pdeng, u Conrad u la ong ba ka long shisha kaba shitom ïa ka Sorkar, ha kaba u la kdew ba ka Sorkar ba la leit kam shym la lah ban ïaid shakhmat bad ka dei ka rai kaba eh bha ban shim.
“Ngam mut ban ong ba ki (Sorkar barim) khlem leh eiei, ka dei kaba eh bha ban shim rai, hynrei ngi la rai la ka rai ban ïaid shakhmat bad ban ïakhun hapoh Kashari Supreme Court, ngi la ïoh ïa ka rai ban weng ïa ka jingkhang tih dewïong”, u la ong.
Ha kawei ka liang, u Conrad u la ong ba ka Sorkar ka khmih lynti ba ka Jylla kan ïoh khajna na u dewïong hapdeng T.500 haduh T.900 klur ha ka shisnem.
