Shillong, K’lyngkot 30
Ka shlem treikam u District Sports Officer (DSO) Ri-Bhoi District ha ryngkat ka jingïasnoh kti lang bad ka shlem u Deputy Commissioner, kin pynlong ïa ka prokram ai jinghikai phutbol na ka bynta ki heprit ba la tip kum ka Winter Football Coaching Camp ha ki saw tylli ki jaka jong katei ka district.
Ki jaka ban pynlong ki dei ha madan Jatah kaba ha Mawhati, madan Mawtnum kaba ha Nongpoh, madan Kyrdem kaba ha Bhoirymbong bad ha madan Mawlasnai. Kine ki prokram ai jinghikai kin sdang naduh ka 3 tarik u Rymphang mynta u snem.
Ka rta jong ki heprit shynrang bad kynthei kiba lah ban wan sha katei ka prokram ai jinghikai kan long naduh 13 haduh 16 snem.
Te kumta na ka liang u DSO, Bah Bobby L. Nongbet u la wer ïa ki khynnah ïalehkai kiba don ïa ki sap ba kyrpang ha ka phutbol ba kin wan sha katei ka prokram ai jinghikai khnang ba ki lah ban ïoh ka jingshah hikai kaba paka bad ba ki lah ban nangkiew shaphrang ha kam ïalehkai jong ki.
