Shillong, K’lyngkot 30
Ka Sorkar Jylla ka la pynmih ïa ka hukum kaba la bthah ïa ki District Election Officer (DEO) ban hukum ïa ki Dorbar Shnong ne Rangbah Shnong ba kim dei ban khang ha ka ban pynlong ïa ki jingïalang paidbah (Public Meeting) jong ki seng saiñpyrthei ha ka ilekshon MDC jong ka KHADC bad JHADC ka ban long ha ka 21 tarik Rymphang.
Ïa kane ka hukum la mih da ka Deputy Secretary ka tnat District Council Affairs ka Jylla Kong M Shira Kshir ha ka Sngi Palei, ka 30 tarik halor ka jingujor jong ka Voice of the People Party (VPP) kaba la dawa na ka tnat DCA ba kan pynmih ïa ki jingbthah sha baroh ki Rangbah Shnong ba kin kiar na kaba shim ïa kano-kano ka sienjam ka ban ktah ïa ka jingpynïaid ïa ka ilekshon kaba laitluid bad ka bym shah liang.
Ha ka shithi sha u Commissioner & Secretary ka tnat DCA, u General Secretary bad MP ka VPP, Dr Ricky AJ Syngkon, u la kynnoh ba ka rai jong katto-katne ki Rangbah Shnong, Sordar Shnong ka la pynduh lad ïa ka VPP bad ïa ki kyrtong jong ka ban pynlong ïa ki jingïalang paidbah ban ïalap ilekshon.
Lah ban kdew ba kane ka jingujor ka la mih tang hadien khyndiat sngi ba ka Mawlai Town Dorbar lem bad ki kyrtong, ki la rai bad mynjur ban beit ïa ki jingïalap ilekshon tang da ki Common Platform ha baroh ki shnong ka Mawlai ym shuh da ki jingïalang paidbah.
Ïa kane ka rai la pynshong nongrim halor ka jingud jingnam jong ki kmie kpa, namar ba ki khun ki jong ki, ki dang don hapdeng ki eksamin bapher bapher jong ka Meghalaya Board of School Education (MBoSE).
Katkum ka hukum, ka Deputy Secretary ka la ong ba baroh ki Dorbar Shnong, Rangbah Shnong ki dei ban shah ïa baroh ki seng saiñpyrthei kynthup ki kyrtong shimet ba kin pynlong ïa ki jingïalang paidbah.
