Shillong, K’lyngkot 30
Ka Ryntih FC ka la mad biang sa kawei pat ka jingshah rem ha ka lympung ïalehkai Shillong Premier League 2024, hadien ba ka la shah pynjem khnap haduh 8-0 kol ha ka Rangdajied United FC ha ka Sngi Palei ha SSA Stadium kaba ha First Ground, Polo.
U Owanijuh Pajuh u la ïoh hat-trick hadien ba u la thep lai kol ha ka minit kaba 12, 29 bad 36. Kiwei pat kol ki wan lyngba na u Dibormi Kassar (30), Wansiewdor Nengnong (47 & 54), Aenam Jyrwa (53) bad u Benny Khriam (70).
Kane ka jingjop ka la pynlong ïa ka RUFC ban jam sha ka kyrdan ba-ar ryngkat 26 poiñ na ka bynta ban knieh noh ïa ka kyrdan ba la bat da ka Shillong Lajong (25 poiñ). Katba ka Ryntih ka dangsah ha ka kyrdan sha trai duh ryngkat 3 poiñ hadien ba ka la shah rem haduh shiphew sien lynter ha kane ka lympung.
U Owanijuh u la thep ïa ka kol kaba nyngkong hadien ba la ïarap pynbuh bol da u Freddy B Jyrwa bad hadien kata u la thep biang ïa ka kol ba ar hadien ba u Denelson Pyngrope u la ïoh ban ral bol. Ka hat-trick kaba u la ïoh ka dei hadien shiteng kynta bad kane ka la wan jia ryngkhat, da ka jingshut kaba khlaiñ bor ha kaba u rangapkol ka Ryntih um shym la lah ban kyrda na ka jingshah thep. Kane ka la wan lyngba u Derick Khongsit uba la shut ïa ka bol bad ka la poi sha ki kjat u Owanijuh, u bym shym la pynlehnohei ïa kane ka kabu ksiar.
Khyndiat minit shwa ba un ïoh ïa ka hat-trick, u Owanijuh u la long u nongïarap ban pynbud bol na ka bynta u Dibormi uba la ïoh ban pynkhih jar.
Ka Rangdajied ka la ïoh ban thep sa lai kol tang hapoh 10 minit jong ka kylla miet, ha kaba u Wansiewdor Nengnong uba la wan kum u nongbujli ha ka por shiteng por u la lah ban thep ïa ki ar tylli ki kol. Hapdeng kata, ka Aenam Jyrwa u la ïoh ban thep kol da kaba shut beit-beit sha kol ha kaba u rangapkol ka Ryntih um shym la lah ban leh eiei.
Ïa ka kol ba phra bad khatduh la thep da u Benny ha ka minit kaba 70. Wat la ka Ryntih kam shym la lah ban ïalehkai bha, pynban u Banteilang Lyngdoh u la ïoh ïa ka kabu kaba biang eh, hynrei ka bol kaba u la shut ka la leit dei na u diengkol.
Ka jingïalehkai ha ka Sngi Thohdieng kan long hapdeng ka Nangkiew Irat SC pyrshah ïa ka Sawmer SC ha ka por 2:30 janmiet. Ha ka wat kaba nyngkong ka Sawmer ka la jop da 3-2 kol ïa ka Nangkiew Irat.
