Shillong, K’Lyngkot 30
Ka Shillong Lajong ka la wanphai da ka jingjop ha ka lympung ïalehkai I-League hadien ba ka la lah ban pynliem noh ïa ka Aizawl FC da 3-1 kol ha ka sngi Palei ha Aizawl.
Kane ka nam jop ka la wan urlong lyngba ki kol ba la thep da u Douglas Tardin (9) lyngba ka penalty, kumjuh u Hardy Cliff Nongbri (46) bad u Phrangki Buam (78). Katba u Lalbiakdika (90) u la lah ban pynphai kylla shi kol hashwa ban wai na ka bynta ka Aizawl.
Watla ka Lajong hapoh ka jingïalam u Jose Hevia ka la mad ïa ka jingshah rem ha ka jingïalehkai ba la lah ha ka Namdhari da 5-2 kol, hynrei ka la lah ban wanphai da ka jingkhlaiñ bor na ka bynta ban pynliem ïa katei ka kynhun kaba na Mizoram.
Lyngba kane ka jingjop ka la pynlong ïa ka Lajong ban jam shi kyrdan kata sha kaba san bad kamai 16 point na ki khadwei sien ïakhun, katba ka Aizawl ka dangïai sah ha ka kyrdan ba shiphew bad 9 point.
Te kumta ka Lajong kan leit sha Srinagar na ka bynta ban ïakhun pyrshah ïa ka Real Kashmir FC ha ka 2 tarik u Rymphang ha ka por 2 nohphai sngi.
