Shillong, K’lyngkot 30
Ka Sorkar Jylla ka la mynjur ban seng ïa ka ‘Pla Tyngka Cooperative Society’, ka ban ai jingkyrshan kyrpang ïa ki kynthei (Kong) hapoh ki Self Help Group (SHG) ba kin pynkhlaiñ ïa ka seng kam seng jam ha ki shnong nongkyndong hapoh ka Jylla.
Haba pyntip ïa kane ka rai hadien ba la kut ka jingïalang jong ka Kynhun Myntri ha ka Sngi Palei, u Myntri Rangbah ka Jylla, Conrad K Sangma u la ong ba kane ka sienjam ka dei kaba la leh da ka jingthmu ban ai ram khlem jingeh ïa ki Self Help Group (SHG) ban kyntiew ïa ka ïoh ka kot bad ka jingshaniah ki kynthei halade ha ka liang ka pisa tyngka.
U Myntri Rangbah u la ïathuh ba ka jingdon ki SHG ka la kiew na ka 4000 tylli ha u snem 2018 sha palat 51,674 tylli mynta, bad ka jingdon ki dkhot ka la kiew na ka 30,000 ngut sha ka 5.2 lak ngut ki Kong.
U la ïathuh ruh ba ka jingpyndonkam pisa jong ki SHG ka la kiew na ka T.40 klur ha u snem 2018 sha ka T.1000 klur haduh mynta.
U la ong ba ka Pla Tyngka Cooperative Society, kaba nyngkong eh ka Jylla kan treikam kum ka nongbei tyngka ïa ki SHG, ban ailad ba kin lah ban kynshew ïa ka pisa bad shim ïa ka ram haduh shiphew shah na kaei kaba ki kynshew khlem da donkam ban ïaid ïa kiba bun ki kyndon kumba long ha ki Bank.
Katkum ka jingong u Conrad, kane ka jait rukom treikam la leh ruh ha Rajasthan, Andhra Pradesh bad Telangana, bad ka Jylla Meghalaya ka dei kaba saw ha India ban seng ïa kum kane ka Cooperative Society.
“Ka Sorkar ka la buh thong haduh 80,000 tylli ki SHG ha kine ki khyndiat snem ban wan bad T.8,000 klur ha ka pisa ban pyntyllun haduh u snem 2028”, u la ong.
U la ong ba kane ka Cooperative Society kam dei ka bank, hynrei kan ai ka jingshakri ha ka liang ka pisa pilaiñ ba la pynwandur kyrpang tang ïa ki SHG jong ki Kong. U la ong ruh ba kane ka sienjam kan pynkhlaiñ ïa ka jingseng kam ha ki jaka nongkyndong bad pynïoh ïa ka jingkiew ha ka ïoh ka kot.
U Myntri Rangbah u la ong ba ka SHG movement ha Meghalaya ka la shim ïa ka bynta kaba kongsan ha ka ban pynbiang ïa ka kamai ka kajih jong ki Kong bad pynmih kam ha ki nongkyndong.
“Bun ki dkhot ki la pyndonkam ïa ka pisa ba la lum lang ban sdang ne pynroi ïa ki kam, bei tyngka na ka bynta ka jingpule jong ki khun, bad ban im ha la ka jong ka kamai”, u la ong.
U la ong ruh ba bun ki kynthei mynshwa kiba hap ïaksaid ban siew bai skul mynta ki la biang ha ka ïoh ka kot, bad ka rukom treikam jong ka SHG ka la ai ha ki ïa ka jingshngaiñ ha ka liang ka ïoh ka kot bad ka burom.
U Conrad u la ong ruh ba kane ka Cooperative Society kan bud ïa ka jingpynbeit kaba la buh kyrdan, kata ki SHG ba kynthup ïa 10-15 ngut ki kynthei ha kawei ka kynhun kin long ki nongrim, katba ki Village Organisation (VO) ki dei kiba mihkhmat ïa ki SHG kiba bun. U la ong ba mynta ki don haduh 5,640 tylli ki VO ha ka Jylla.
