2nd Division: Da 167 run pynliem ka Cluster ïa ka Akadimia Langsning

Katba u D.P Tynsong bad u Shaan ki la shim mar 2 wiket na ka bynta ka Akadimia.

Shillong, K’lyngkot 31

Ka Cluster CC ka la ïoh jingjop ha ka Second Division Shillong Cricket League 2024-25 hadien ba ka la pynliem noh ïa ka Akadimia Langsning CC da 167 run ha ka Sngi Thohdieng.

Ha kane ka jingïakhun kaba la long ha madan Urkaliar Shillong, ka Akadimia Langsning kaba la jop kynting pisa, ka la ailad ïa ka Cluster ba kan tied nyngkong ha kaba ka la ïoh 245 run bad shah pynhap 7 wiket ha ki 20 over. Kane la wan urlong lyngba ka jingïalehkai bha u Roshan uba la khyrwit ïa ka shiteng spah run kaba 62 na ki 32 bol lem bad u Kasim uba la ïoh 66 run na ki 27 bol. Katba u D.P Tynsong bad u Shaan ki la shim mar 2 wiket na ka bynta ka Akadimia.

Haba wan beh ïa ka thong ba la buh da ka liang pyrshah, ka Akadimia ka la ïoh tang 78 run bad shah pynhap 10 wiket ha ki 17 over. U Samelawan u la tied 24 run na ki 35 bol bad u Mackie u la ïoh 10 run na ki 16 bol. Katba u Rahul u la shim 4 wiket bad ïa ki 2 wiket da u Basant. Ïa ka nam ‘Player of the Match’ la ïohpdiang da u Rahul.