Nongpoh, K’lyngkot 31
U Bah Arbinus Lyngdoh, MDC barim jong ka Umroi konstitwensi uba la wan ban synran lang ïa u Bah George B. Lyngdoh ha ka jingthep kyrteng mynta ka sngi, u la kynthoh jur ïa ki nongïalam jong ka Congress kiba la ïaid lait bad leh bym suitñiew ïa la ki jong ki kyndon kiba ki la dep hi ban buh kaba la pynlong pat ïa u lem bad ki nongkyrshan ban mih noh na ka Congress bad leit ban ai jingkyrshan pura ïa u Bah George B. Lyngdoh, MLA barim ka Umroi konstitwensi.
Ka jingkynthoh utei u nongïalam pyrshah ïa ka Congress ka dei halor ka jingshah pynduh tiket ka jong u, da kaba ong ba kum u nongïalam, u la trei shitom ban lum ban lang bad pynkhlaiñ ïa ka seng hapoh Umroi konstitwensi bad ruh wat ban pynïoh ïa u kyrtong jong ka seng Congress na Mawhati konstitwensi.
Hynrei kaei kaba la pynsngewsih eh ïa u, ka dei ba wat hapdeng kitei ki jingtrei shitom ki jong u, na ka liang ki nongïalam ka seng ki la leh bym suitñiew bad pynduh noh ïa ka tiket jong ka Congress ïa u ban ai pat ha u Bah M.D. Syiem, u briew u bym don ha ka seng bad ruh uba wan thep kyrteng hadien ba la kut ka tarik thep kyrteng kaba ki nongïalam ka seng hi ki la dep ban buh.
Utei u nongïalam barim ka Congress, u la ong ruh ba ka jingmynjur ban kyrshan bad ai lad ka jong u ïa u Bah George B. Lyngdoh ban ïakhun ïa kane ka ilekshon MDC mynta ka kynti ka dei namar ba u Bah George B. Lyngdoh u dei uba tbit bad uba shemphang ban long kum u nongïalam da kaba bynrap ba ym pat don satia ki MLA kiba kham palat ban ïa u Bah George B. Lyngdoh, uba la mihkhmat teng kum u MLA ha ki snem ba la dep.
Shuh shuh, u Bah Arbinus Lyngdoh u la pynshai paidbah ruh ba ka pyrthei baroh ka dei ban tip, bad kata ka jingshisha ka long ba u Bah George B. Lyngdoh um shym la phet satia na ka seng Congress, hynrei ka dei ka seng Congress kaba la beh seng ïa u.
