Shillong, K’lyngkot 31
U kyrtong jong ka Congress na Laitumkhrah -Malki Constituency, Bah Manuel Badwar, u la ong ba ha kane ka kynti kaba mynta ki paidbah ki la sngewthuh kham shai bad ba ki jingmut-jingpyrkhat jong ki ruh ki lah kham khlaiñ bha ha kaba la sakhi ruh ba ka jingshongshit ka la kham duna bha ha kane ka ilekshon MDC kaba mynta ym kum ha ka por ilekshon MLA ba ka National People’s Party (NPP) ka la theh kput da ka pisa sha u paidbah ban pynbiej ïa ki.
“Ka jingshongshit kaba ngi mad ha ka ilekshon ba la dep ka long ba ka NPP katno ka theh pisa. Ka jingpynbiej ïa u briew da ka pisa shisien 5 snem kam dei kaba kai ha kato ka ilekshon ba la dep”, ong u Bah Manuel.
Haba kren sha ki lad pathai khubor hadien ka jingwan thep kyrteng ha ka 31 tarik Kyllalyngkot, 2025 ha Inter-State Bus Terminal (ISBT) kaba don ha Mawlai-Mawïong, u Bah Manuel u la ong ba ka Article 371 ka dei kaei-kaei kaba ym lah ban wanrah namar ka pyntlot ïa ka Jaitbynriew Khasi bad ong ba ka Sixth Schedule ka dei kaba don ïa ka bor bad ka iktiar jong ka hynrei ka dei ka rukom pyntreikam ïa ka ba kan sa don ka jingshah ïuhroit ka Jaitbynriew kat shaba phai.
“Ka dei ka seng Congress hi kaba ai ïa ka District Council bad ngi kwah ban buh ïa ka keiñ namar ka jingdonkam ka don. Nga ju ong barabor ba lam dei ka Sixth Schedule kaba tlot bad ka Aiñ lei kaba bun hynrei ka dei ka rukom pyntreikam ïa ka Sixth Schedule kaba ngi tlot eh. Haba ngim pat lah ban pyntreikam kham bniah ïa ka, ngi shah ïuhroit kat shaba ngi phai hynrei nangne shakhmat da ka jingkyrmen bad ka jingsngewthuh, na ka Congress ngi la buh ba ngin kham pynkhlaiñ shuh-shuh ïa ka Sixth Schedule”, ong u Bah Manuel.
Shuh-shuh, u Bah Manuel u la ong ba ïa ka skhim sam sniang ïa kaba la tip kum ka FOCUS ruh kaba dei ka skhim sha nongkyndong, na ka liang ka Sorkar ka la wanrah sha sor bad kane kam ïahap satia.
“Kaba ym lah ban long namar ngi sah ha ki jaka kiba hap hapoh ka Municipal ha kaba ki la leit ban sam T. 5000 sha man la ki thliew ïing. Haduh mynta ngam ju ïohi uwei ruh u sniang ha Malki bad Laitumkhrah bad kito ki jingshongshit ki long tang ban pynbiej ïa u briew ban thep ïa ka vote”, bynrap u Bah Manuel.
