Khang tala ka Mawmarin ïa u tower Airtel

Phewse, kam long kumta kumba la thrang la angnud da ki paidbah.

Nongstoiñ, K’lyngkot:

Ka jingangnud jong babun-balang ba ka jingwan jong ki tower mobile ha ki shnong bapher-bapher kan ai jingmyntoi ïa ki paidbah. Phewse, kam long kumta kumba la thrang la angnud da ki paidbah.

Kane ka la paw ruh hapoh ka shnong Mawmarin kawei na ki shnong kaba don hapoh ka West Khasi Hills District ha kaba ki nongïalam shnong jong kane ka shnong hapoh ka jingïalam jong u Sordar u Bah Brocklin Lyngdoh ryngkat ki rangbah jong ka shnong ha ka 20 tarik mynta u bnai ki la leit ban khang tala noh syndon ïa u tower mobile jong ka kompeni Airtel uba don hapoh ka shnong.

Ki nongïalam jong ka shnong Mawmarin ha ka kyrwoh khubor ki la ong ba ka daw kaba pynlong ïa ka shnong ba kan leit ban khang tala noh ka dei namar ba utei u tower mobile ka Airtel uba don hapoh ka shnong um lah ban ai ka jingshakri ne jingmyntoi ïa ki paidbah.

Shuh shuh la ong ruh na ka liang ki nongïalam shnong ki la pyrshang ban leit ai jingthoh bad pyntip sha ka kompeni bad wat sha u DC ka West Khasi Hills ruh ba un shimkhia na ka bynta ban peit lem ïa kane ka jingeh jong ki paidbah nongshong shnong bad ha ka 6 tarik u Kyllalyngkot, 2025 ki bor ba dei peit ka kompeni Airtel ki la phah wan ban ïakynduh ïa ki nongïalam shnong hapoh ka ophis u DC hynrei kitei ki briew jong ka kompeni ki khlem wan mih satia.

“Kane ka jingleh jong katei ka kompeni ka pyni ïa ka jingkheiñ troiñ ïa ngi ki nongïalam shnong,” ong ki nongïalam shnong bad bynrap ba dei ha ka 18 tarik mynta u bnai na ka liang ka Executive Dorbar Shnong ka la rai ba ïa mynta shipor yn khang tala noh shwa ïa u tower mobile ka kompeni Airtel ba don hapoh ka shnong Mawmarin tad haduh ba ka kompeni kan shimkhia halor kane ka jingeh.

Ki la ong ruh ba ka Executive Dorbar Shnong kan sa phah ka jingpyntip sha ka MeECL ruh ban ai ka jingtrei lang bad ka shnong ha kaba ïadei bad ka jingai connection light ïa u tower mobile.