Khmih lynti u Messi ban dang ïalehkai sa ha ka World Cup 2026, la ong u coach ka Argentina

"Ngin hap ban ap bad peit kumno kiei-kiei kin ïaid. U Messi u tip ïa kaei kaba ngi pyrkhat bad u long uba stad tam na ngi baroh," la bynrap biang u coach.

Shillong, K’lyngkot 31

U khlur ïalehkai ka Argentina, Lionel Messi, u kwah ban ïalehkai ha ka World Cup 2026, hynrei u dang kloi than ban ai kano-kano ka jingpynbna paidbah, la pynpaw u coach kane ka kynhun u Lionel Scaloni.

U Scaloni, uba la lah ban btin lynti ïa ka Argentina na ka bynta ban rah ïa ka nam lahduh ha ka World Cup 2022 kaba la long ha Qatar, u la pynpaw ïa ka jingkwah jong une u rangïalehkai ba la 37 snem ka rta uba la ïohpdiang ïa ka khusnam Ballon d’Or haduh phra sien, ban ïai don hapoh kane ka kynhun.

“Kaei kaba nyngkong eh ban ong ka long ba baroh ar ngut ma u bad ki paralok jong u, ki tip ba ka dang don ka por kaba biang bad ma u bad baroh ki kwah ban ïalehkai ha ka World Cup,” ong u Scaloni.

“Ngin hap ban ap bad peit kumno kiei-kiei kin ïaid. U Messi u tip ïa kaei kaba ngi pyrkhat bad u long uba stad tam na ngi baroh,” la bynrap biang u coach.

U Scaloni u la kren ruh halor ka rai jong u rangïalehkai barim jong ka Argentina, u Angel Di Maria, ban shongthait noh na ka jingïalehkai bar ri, hadien ba u la jop ïa ka nam lahduh kaba ar ha ka Copa America mynshem snem.

“Na kaei kaba u la ong, ka la kut noh. Bad ha ka rukom kaba bha tam. Lada u la thoh ïa ka phlim jong u, ïa ka kot jong u, ïa ka jingïathuhkhana phutbol jong u, ngam tharai ba un jin da la thoh ïa ka kumba u la pynkut ïa ka,” la bynrap biang u Scaloni.