Shillong, K’lyngkot 31
U Bah Samlin Malngiang ha ka Sngi Thohdieng u la leit ban thep kyrteng kum u kyrtong na ka National People’s Party (NPP) ban ïa aireng ha kane ka ilekshon ban wan sha ka Khasi Hills Autonomous District Council (KHADC) na Nongspung-Sohïong konstitwensi.
“Hooid, ki don hi katto-katne ki aiñ kiba don hangtei, ngi ïohi bun ba ki la biang hi, hynrei ka shu long pat kumno ba ngin pyntreikam hok ïa ki,” ong u Bah Malngiang haba kren sha ki lad pathai khubor hadien ba la dep thep kyrteng ha ophis ka Deputy Commissioner, East Khasi Hills.
Haba kdew ba u la ïakhun ïa kane ka ilekshon hadien ka jingkyrpad ka seng, MDC lem bad ki paidbah, u la ong ba haba ïadei bad ka jingïakhun jong kiwei pat ki kyrtong, um don jingtip eiei bad um treh ban shim kabu namar ka ilekshon hi ka dei beit ka ilekshon.
Halor ka jingdon kiba bun ban kiar ïakhun na ka NPP, u la ong, “Kum u briew uba nga ïeng ha ka nongrim, kaei kaba nga la ïaid ha ka MLA, ngam kwah ban shu ïakhun kum u kyrtong shimet, nga ïohi ba ka NPP haduh mynta, ka dei ka seng kaba don ïa ka nongrim, ka synshar ïa ka Sorkar bad ka ïalam ruh ïa ka EC hangtei (KHADC).”
“Nga sngew dei hi ba kiei ki mat treikam hangtei ruh ka shimkhia haba ïadei bad ka District Council, te nga sngew dei ban ïakhun beit na kane ka seng,” u la ong.
Haba ban jur halor ka synshar-khadar kaba beit bad ba khuid kum kawei na ki mat ba un rah sha u paidbah ha kane ka kynti, u la pynkynmaw ba ha shuwa, u la wanrah ïa ka synshar-khadar kaba bha tam, kaba na ka jingsynshar tnum ïing la lah ban ai la u jong u pud u sam ha man la ki shnong ki thaw bad ïa mynta kaba donkam ka long ban pynkhlaiñ bad pynbha shuh-shuh ïa kane ka mat hapoh konstitwensi.
Haba jubab, u la ong, “Ha ka jingïaleh ilekshon, ka MP bad MDC ka ïapher. Ka MDC ka don la ki jong ki jong ki konstitwensi. Ngim dei bad ong ïa kita kiwei la ki long ne ym long, ngi shim beit ba ka seng jongno-jongno ka don la ka jong ka nongrim. Nga ruh nga ïeng ha la ka jong ka nongrim, ngim dei pat ban kdew kti ïa kiwei, ngi ïaid ha ka la nongrim bad ngi burom ïa ka rai jong u paidbah.”
Haba kylli kaei kaba un leh lada poi sha ka thong khamtam haba ïadei bad ki khappud, u la ong, “Ngi donkam ban wanrah ïa ka mat halor ka khappud khamtam ngi lei ngi don ïa kawei ka shnong kaba hap hapoh Hima Sohïong, ka Nongwah-Mawtamur, kane ka don ha khappud, naduh mynshuwa kane ka jaka ka hap hapoh ka Hima Sohïong. Ngi donkam ban rah ïa kane ka mat khamtam haba ka dei ka mat kaba hap hapoh konstitwensi lajong.”
Shuh shuh u la bynrap, “Ki paidbah hi mynta ki sngewthuh, baroh shi katto, ki briew ki shah ïalam bakla ïa kane ba ka dei ka kam seng, hynrei mynta ki paidbah Sohïong ki sngewthuh kham bha bad ki ong ba ngi donkam ïa u briew ym ïa ka seng. Kane ka dei ka jingkyrmen kaba ki ai ba ngan sa mih shakhmat bad nga tikna ban jop halor kane ka nongrim.”
