SPL 2024: Lyngba u Hilford ïakhaid ka Sawmer bad ka Nangkiew Irat

Lyngba kane ka jingïakhaid, ka Nangkiew Irat ka la don 16 poiñ na ki 12 sien ïakhun, katba ka Sawmer ka don 12 poiñ na ki 12 sien ïakhun.

Shillong, K’lyngkot 31

Ka Sawmer SC ka la ïasam mar shi poiñ bad ka Nangkiew Irat SC ha ka Shillong Premier League 2024, hadien ba ki la ïakhaid mar 1-1 kol ha ka Sngi Thohdieng ha SSA Stadium kaba ha First Ground, Polo.

Wat la u Wallamsuk Nongkhlaw u la ïoh ban pynkhih jar nyngkong ha ka minit kaba 6 na ka bynta ka Nangkiew Irat, hynrei u Hilford Lyngkhei (69) u la lah ban pynïakhaid kylla na ka bynta ka Sawmer.

Kane ka la pynkut noh ïa ka jingshah rem kaba san sien lynter jong ka Sawmer, hynrei ka la pynjlan ïa ka jingïakhun kaba ïakhaid ïa ka Nangkiew Irat mynta sha ka saw sien.

Hadien ba ka la ïoh lyngba ka penalty, ka Nangkiew Irat ka la ïoh shuh shuh ïa ka kabu lyngba u Ronaldkydon L Nonglait ha ka minit kaba 40 bad hadien la ïoh da u Jefferson Pakynteiñ, hynrei u la shah khanglad noh ha u nongapkol u Jeffrey G. Jyrwa shwa ban kut ka kylla step.

Ka Sawmer ka la long kaba donbok ban ïoh thep kol ha ka kylla miet lyngba u Hilford ha kaba u rangapkol ka Nangkiew Irat u Surjay Kumar Pariyar um shym la lah ban kyrda na kane ka jingshah thep. Kane ka jinglah ban pynïakhaid ka la nang pynïoh mynsiem ïa kine ki kynhun ba kin ïai bteng ban ïakhun tyngeh shuh shuh, hynrei haduh kaba kut kim shym la lah ban pynurlong bad ki la mad ïa ka jingïakhaid.

Lyngba kane ka jingïakhaid, ka Nangkiew Irat ka la don 16 poiñ na ki 12 sien ïakhun, katba ka Sawmer ka don 12 poiñ na ki 12 sien ïakhun. Hynrei kine ki kynhun ki dang ïai sah ha kajuh kyrdan ha kaba ka Nangkiew Irat ka la don ha kyrdan basan bad ka Sawmer ha kaba phra.

Kane ka lympung kan bteng biang ha ka 3 tarik u Rymphang ha kaba ka Ryntih FC kan ïakhun pyrshah ïa ka Langsning FC ha ka por 2:30 nohphai sngi.