Shillong, K’lyngkot 31
Ki kyrtong ka UDP ba kynthup ïa u MLA bad u MDC ki la pyndep ïa ka jingthep kyrteng ha ka Sngi Thohdieng na ka bynta ban ïakhun ïa ka ilekshon MDC ka ban long ha ka 21 tarik u Rymphang. Kine ki kyrtong ki kynthup ïa u Bah Mathew Beyondstar Kurbah uba dei u MLA na Mawphlang, Bah Mitchell Wankhar MDC ba mynta na Laban-Mawprem konstitwensi, u Bah Auguster Jyrwa na Jaïaw konstitwensi bad Bah Desmond K. L Mawlong na Nongthymmai konstitwensi.
Haba kren sha ki lad pathai khubor, na ka liang u Bah Kurbah u la ong ba u don jingkyrmen ban ïoh ïa ka jingjop, namar u la dei lypa u MLA jong ka Mawphlang konstitwensi bad u kyrmen ba ki paidbah kin pynjop donburom ïa u kum u MDC, namar kum u MLA u la dep ban trei lypa shibun ki kam ha ka konstitwensi.
Na ka liang u Bah Auguster Jyrwa u la ai khublei ïa u Bah Paul Lyngdoh MLA uba la ai lad ïa u ban ïakhun ïa ka ilekshon MDC, ha kaba u la pynpaw ba da ka jingtrei shitom u kyrmen ban poi sha ka thong jong ka jingjop.
U Bah Mitchell Wankhar u la ong ba u kyrmen ban jop ïa kane ka ilekshon MDC namar ba ki kyrtong kiba ïakhun pyrshah ïa u kim don ïa ka jingshemphang. U la ong ruh ba donkam ïa ki briew ba la shemphang ha district council ban wanrah shuh shuh ïa ki aiñ ban pynkhlaiñ shuh shuh ïa ka Khyrnit ba Hynriew.
Na ka liang u Bah Desmond K.L Mawlong u la ong ba ka thong jong u lada u poi sha ka jingjop u kwah ban pyntreikam ïa ka Traditional Health Medicine Commission kaba la don lypa, hynrei kaba tlot bor namar kim don ba buddien ban pynskhem ïa kane ka aiñ.
Haba kylli, u la ong ba ka jingïaleh ka don beit lada mih shakhmat ban ïakhun ïa ka ilekshon lada hap ïakhun bad u CEM ka KHADC lane badno-badno ruh.
