
Shillong, Rymphang 02
Ka lympung ïalehkai 38th National Games 2025 ka la nangjam shaphrang ha Uttarakhand ha ka Sngi U Blei ha kaba ka Services Sports Control Board (SSCB), Karnataka bad ka Maharashtra ki la ïoh ban knieh noh ïa ka kyrdan ba la bat da ka Manipur.
Kumba ka paw ka SSCB ka la ïoh ban bat ïa ka kyrdan ba hakhlieh da kaba ka la khur 26 tylli ki takma. Kine ki kynthup ïa 14 tylli ki takma ksiar, 7 ki rupa bad 5 ki rnong. Ïa ka kyrdan ba-ar la bat da ka Karnataka kaba la khur 23 tylli ki takma (13 ksiar bad mar 5 ki rupa bad ki rnong).
Ïa ka kyrdan balai la ïoh ban bat da ka Maharashtra kaba la khur 41 tylli ki takma kiba kynthup ïa 11 ki takma ksiar, 18 ki rupa bad 12 ki rnong. Ka Manipur ka la hiar mynta sha ka kyrdan basaw bad ka la long tang kawei ka jylla na ka thaiñ shatei lammihngi ban don hapoh ka thup kaba shiphew. Kane ka jylla ka la khur 24 tylli ki takma (11 ksiar, 9 rupa bad 4 rnong).
Nalor ka Manipur, kiwei pat ki jylla ka thaiñ shatei lammihngi kata ka Arunachal Pradesh kaba la khur 7 tylli ki takma (mar 2 tylli ki ksiar bad rupa lem bad 3 ki rnong), kumjuh ka Assam kaba la khur 12 tylli ki takma (7 ki rupa & 5 ki rnong) bad ka Mizoram kaba la khur kawei ka takma rnong.
Haba phai sha ka Meghalaya haduh mynta kam pat shym la ïoh ban khur wat tang kawei ka takma rnong ha kane ka lympung, wat la ka la phah ban leit shim bynta haduh khyndai tylli ki jingïalehkai (Shooting, Athletics, Judo, Archery, Rowing, Wushu, Aquatics, Canoeing & Kayaking bad ka Boxing).