
Shillong, Rymphang 02
Ki snem jong ka jingtrei shitom, ka jinglong ryntih bad ka jingaiti lut na ka bynta ki nongïalehkai bad ki dkhot ka Mawlai SC ka la lah ban pynurlong ban ïoh kheit ïa u soh ka jingjop ha ka 4th Meghalaya State League 2024. Kane ka wan jia hadien ba ka la lah ban pynliem noh ïa ka Shillong Lajong FC lyngba ka tie-breaker da 5-4 kol ha ka jingïakhun final kaba la long ha Wahïajer Multipurpose Sports Complex Stadium ryngkat ka jingsakhi da ki hajar ngut paidbah.
Haduh kaba kut jong 90 minit bad wat hadien ba la pynjlan ïa ka jingïakhun sha ka extra time kaba la neh haduh shiteng kynta, kine ki kynhun kim shym la lah pynkhih jar na ka daw ka jingïalehkai bha jong baroh ar ki kynhun kiba la pynhun ïa ki hajar ngut ki paidbah kiba la pyndap hi smam ï aka stadium hi baroh kawei.
Wat la ka ka Lajong ka la lah ban jam sha ka final lyngba ka tie-breaker ha ka jingïakhun pyrshah ïa ka Rymbai Shkenshynriah, hynrei kane ka kynhun ka la ïakhun tyngeh pyrshah ïa ka Mawlai. Ka Lajong ka la ïoh ïa ka kabu kaba biang eh lyngba u Firstborn Roy Khongsti, hynrei ka la shah khanglad noh ha u rangapkol ka Mawlai, u Lambhamiki Lamare.
Da kane ka jingjop ka Mawlai kum ka lahduh ka la khur ïa ka khusnam pisa lyngba ka cheque kaba T. 5 lak tyngka lem bad ka trophy ba la sam da u Symbud Myntri Rangbah u Bah Sniawbhalang Dhar ha ka jingïadon lang u MLA ka Jowai u Bah Wailadmiki Shylla, u President ka Meghalaya Football Association u Bah Hamletson Dohling bad u General Secretary ka MFA u Bah Sunesh Syiem. Katba ka Lajong ka la ïoh T.3 lak tyngka.
Ïa kane ka lympung ïalehkai MSL la pynïaid da ka MFA ha ryngkat ka jingkyrshan lang da ka tnat ïalehkai jong ka Sorkar Jylla naduh ba la sdang ïa ka ha u snem 2017. Ka wanrah lang ïa ki kynhun ba tbit na baroh ki district kiba la ïasoh bad ka MFA ha kawei ka lympung bad ha kane ka kynt kaba mynta ki don haduh 24 tylli ki klob kiba la wan shim bynta na kylleng ka jylla na ka bynta ban ïaknieh kum ka lahduh.
Ban khan pynitynnad ïa kane ka jingïalehkai MSL la pynlong ha kylleng ki district jong ka Jylla bad ïa ka jingïakhun final la pynlong ha Wahïajer, ha ka sien kaba nyngkong. Ka Tyrsad ka la long ruh ka jaka ïalehkai kaba la pynlong ha ka sien kaba nyngkong na ka bynta ka jingïalehkai group.
Ka Mawlai ka la ïai bteng ha kane ka lympung bad dei ha kane k aka kynti kaba mynta ba ka la lah ban pynurlong. Lah ban kdew ba ha ka final jong u snem 2017 la rah da ka Niaw Wasa United bud sa ka Lajong ha u snem 2019, ka Rangdajied United ha u snem 2023 bad mynta ka Mawlai.
Ïa ka nam Player of the Final la ïoh da u rangïalehkai ka Lajong u Ïohborlang Lyngdoh Lyngkhoi, katba kiwei pat ki rangïalehkai ka Mawlai kata u Lambhamiki Lamare (Golden Glove), bad u Khrawkupar Jana (Golden Boot) uba la lah ban thep haduh 12 kol bad u Damanbhalang Chyne (Golden Ball of the tournament).