I-League: Wanphai ka Real Kashmir da ka jingjop ïa ka Shillong Lajong ha la ïing

Watla ka Lajong ka la pyrshang ban pynphai, hynrei haduh kaba kut kam shym la lah ban pynurlong bad ka la mad ïa ka jingshah rem.

Shillong, Rymphang  02

Ka Shillong Lajong FC ka la mad ïa ka jingshah rem ha ka Real Kashmir da 2-0 kol ha ka lympung ïalehkai I-League ha ka Sngi U Blei ha TRC Football Turf, Srinagar.

Kane la wan urlong lyngba ki kol ba la thep da u Aminou Bouba bad u Kamal Issah na ka bynta ka pynlong ïa katei ka kynhun na Kashmir ban jam sha ka kyrdan basaw.

Wat la ka Lajong ka la lah ban pynliem ha la ïing ïa ka Real Kashmir da 1-0 kol ha ka jingïakhun ba la long ha ka 10 tarik u Kyllalyngkot mynta u snem, pynban ha kane ka jingleit ïalehkai shabar na la ïing ka la long da khongpong ha kaba kam shym la lah ban thep kol.

Kumba ka paw ha kane ka jingïakhun baroh ar ki kynhun ki la pyrshang ban ïakhun tyngeh  naduh kaba sdang ha kaba ki la ïoh ïa ki kabu kiba biang, hynrei kim shym la lah ban thep. Ka Real Kashmir lyngba ka jingai mynsiem na ki paidbah nongkyrshan ka la lah ban pynurlong ha ka ban pynkhih jar hashwa ban kut ka jingïalehkai jong ka kylla step lyngba u Aminou Bouba (45-4).

Kane ka shi kol ka la nangpynlong ïa katei ka kynhun ban ïai bteng ha ka ban ïalehkai bha shuh shuh ha ka kylla miet bad hashwa ban wan ka la thep biang ïa ka kol kaba ar lyngba u Kamal Issah ha ka minit kaba 88. Watla ka Lajong ka la pyrshang ban pynphai, hynrei haduh kaba kut kam shym la lah ban pynurlong bad ka la mad ïa ka jingshah rem.

Lyngba kane ka jingjop ka la don ha ka kyrdan basaw ha kaba ka la ïarangkat mar 19 point bad ka Gokulam FC bad ka Rajasthan kiba la hiar sha ka kyrdan ba san bad ba hynriew, katba ka Lajong ka la don ha ka kyrdan ba hynñiew bad 16 point na ki khadar sien ïakhun.

Te kumta ka Lajong kan wanphai sha la ïing na ka bynta ban ïakhun pyrshah ïa ka Namdhari FC ha ka sngi Saitjaiñ. Ha ka jingïalehkai shabar na la iing myn ha ka 25 tarik u Kyllalyngkot ka Lajong ka la shah rem ha ka Namdhari da 5-2 kol.