Guwahati, Rymphang:
Ka Sorkar Assam ha ka Sngi Thohdieng ka la rai ban pynduh noh ïa ki lai tylli Proposed Reserve Forest (PRF) kiba don ha Tinsukia distrik namar ba ki la pynlah ïa palat 20 hajar ngut ki nongshong shnong ban ïoh ïa ka hok khyndew, ong u Myntri Rangbah ka jylla u Himanta Biswa Sarma.
Ha ka jingïalang jong ka kynhun Myntri, kaba la pynïaid da u Sarma, ka sorkar jylla ka la mynjur ban pynkylla ïa ka PRF sha ki shnong kamai khajna khnang ba ki briew kiba sah ha katei ka thaiñ kin ïoh ïa ka hok ha ki jaka puta.
“Ki don lai tylli ki Proposed Reserve Forest ha Tinsukia. Ngi la rai ban pynduh kyrteng bad pynlong ïa ki kum ki shnong khajna.
Kane kan ïarap ïa ki briew kiba sah hangne ban ïoh ïa ka hok ha ka khyndew ka shyiap,” u la ong ha ka jingïalang bad ki nongthoh khubor ha ka por miet hangne.
Ki lai tylli ki PRF ki long ka Talpathar (170 hektar), Mohongpathar (466 hektar) bad ka 1st Addition to Duarmarah (113 hektar).
“Ki don palat 20,000 ngut ki briew kiba sah ha kine ki shnong bad kim shym la ïoh kano-kano ka hok jaka namar ka jingkhanglad jong ki PRF. Dei na kata ka daw ba ngi la rai ban pynlong ïa kine ki PRF kum ki shnong ba ïoh khajna ha ka jaka ban pynlong ïa ki kum ki Reserve Forest,” la ong u Sarma.
U la ong ïa kane ka jingmynjur jong ka kynhun Myntri kum ka “rai kaba khraw” ban ai jingïarap ïa ki paidbah kiba don ha ka jingeh.
Katkum ka India State of Forest Report (ISFR) 2023, ka jingdon ki khlaw jong ka Assam ka la hiar haduh 84 sq km hapdeng u snem 2021 bad 2023, ha kaba ka jaka baroh kaba don hapoh ki khlaw bad ki dieng ha kane ka jylla mynta ka la poi sha ka 30,415.01 sq km.
