Jop ka Friends United & Hurdles Mawsynram ha ka T20 District Cricket League

Haba wan beh ïa ka thong ba la buh da ka liang pyrshah, ka Lumpaia Avengers ka la ïoh tang 131 run bad shah pynhap 7 wiket ha ki 20 over.

Shillong, Rymphang 03

Ka lympung ïalehkai 4th District League T20 Cricket Tournament 2024 ba la pynïaid da ka East Khasi Hills Cricket Association ka la nangjam shaphrang ha kaba ka Friends United CC bad ka Hurdles Mawsynram ki la ïoh jingjop ha Lah Sngi U Blei.

Ha kane ka jingïakhun kaba la long ha madan Pynshadkhuria kaba ha Saitsohpen, Sohra, ka Friends United ka la pynliem noh ïa ka Lumpaia Avengers CC da 14 run. Ka Lumpaia Avengers kaba la jop ïa ka kynting pisa ka la ailad shwa ïa ka Friends United ba kan tied nyngkong ha kaba ka la ïoh 145 run bad shah pynhap 5 wiket ha ki 20 over. U Ernestin Kyntiewdor Swer u la khyrwit ïa ka shiteng spah kaba 71 run na ki 54 bol. Katba u Miquel Obando Nongbri u la shim 4 wiket na ka bynta ka Lumpaia Avengers.

Haba wan beh ïa ka thong ba la buh da ka liang pyrshah, ka Lumpaia Avengers ka la ïoh tang 131 run bad shah pynhap 7 wiket ha ki 20 over. U Daryll Donald Nongbri u la tied 32 run na ki 36 bol. Katba u  Ernestin Kyntiewdor Swer u la shim 2 wiket na ka bynta ka Friends United. Ïa ka nam ‘Player of the Match’ la ïohpdiang da u Ernestin Kyntiewdor Swer.

Haba phai sha kawei pat ka jingïakhun ba ar, ka Hurdles Mawsynram ka la jop da 8 wiket ïa ka Laitjem CC. Ka Laitjem kaba la kam trai ban tied nyngkong ha kaba ka la ïoh 126 run bad shah pynhap 9 wiket ha ki 20 over. U Poilang Thawmuit u la tied 28 run na ki 35 bol. Katba u Sandy Kharshandi u la shim 3 wiket na ka bynta ka Hurdles Mawsynram.

Haba wan shimti ïa ka pali ba ar, ka Hurdles Mawsynram ka la kynjoh sha ka thong da kaba ïoh 127 run bad shah pynhap 2 wiket ha ki 13.4 over. U Sandy Kharshandi u la tied ïa ka shiteng spah kaba 58 run na ki 28 bol. Katba u Mebanshan Kharsati u la shim shi wiket na ka bynta ka Laitjem. Ïa ka nam ‘Player of the Match’ la ïohpdiang da u Sandy Kharshandi.

Ka jingïalehkai ha ka Sngi Ba-ar ka long hapdeng Royal Rangers pyrshah ïa ka Sohra Combine CC ha ka por 9 baje, katba ka Rangshken CC ïa ka Thynroit SC ha ka por 12:30 mynsngi.