
Shillong, Rymphang 03
Ka jingtrei shitom ka la pynlong ïa ka Langsning FC ban pynliem noh ïa ka Ryntih FC da 2-1 kol ha ka lympung Shillong Premier League 2024 kaba la long ha ka Lah Sngi U Blei ha SSA Stadium kaba ha First Ground, Polo.
U Dauruhipaia Pale (35) u la ïoh thep kol nyngkong na ka bynta ka Langsning ha shwa ba u Basuklang Bina (69) un pynïakhaid na ka bynta ka Ryntih. Hynrei u Dajied-lang Wanshnong (87) u la lah ban pynurlong ïa ka jingjop na ka bynta ka Langsning.
Ka Ryntih ka la mad jingeh naduh kaba sdang jong kane ka aïom ïalehkai, ha kaba ka la shah thep haduh 24 kol bad ka la lah ban thep tang shi kol. Ha kawei pat ka liang ka Langsning ka la hiar ha ka rukom ïalehkai ha kaba sdang jong kane ka lympung, hynrei kham hadien ka la nangkiew shaphrang. Kane ka la pynlong ïa ka Ryntih ban kheiñ sting ha ka rukok ïalehkai, hynrei ha kane ka jingïakhun ka la pyrshang ban ïalehkai bha, pynban kam shym la lah ban pynurlong.
Ka jingïalehkai bha u rangapkol ka Ryntih u Luckystar Lawai ka la pynlong ban khanglad na ka jingpyrshang ki rangïaleh-kai ka liang pyrshang bad kumjuh u Derick Khongsit uba la ïakhun tyngeh na ka bynta ka Ryntih.
Kham hadien u Luckystar um shym la lah ban khanglad na ka jingpyrshang u Dauruhipaia, uba la ïoh ban thep da ka khlieh. Hadien ar minit, u Basuklang u la pyrshang ban thep kol, hynrei u la shah khanglad noh ha u rangapkol ka Langsning u Rajat Paul Lyngdoh.
Hadien katto-katne por ka Ryntih ka la ïakhun tyngeh na ka bynta ban pynphai kylla bad u Andy Mawthoh u la ïoh ïa ka kabu kaba biang eh hapoh ‘box’, hynrei u Basuklang, um shym la pynlehnohei ïa kane ka kabu ksiar kaba u la ïoh.
Ha shwa ban wai ka Langsning ka la thep biang biang ïa ka kol ba ar lyngba u rangïalehkai mihpli u Dajiedlang, uba la ïakhun tyngeh hapoh ‘box’.
Wat la ka Ryntih ka la pyrshang ban pynïakhaid, hynrei kam shym la lah ban pynurlong bad ha kaba kut ka la mad ïa ka jingshah rem.
Lyngba kane ka jingjop ka la pynlong ïa ka Langsning ban kiew sha kyrdan ba saw ryngkat 17 poiñ, hynrei ka la ïakhun bun tylli ki jingïakhun haduh 13 sien. Ka Ryntih wat la ka la nangkiew ha ka rukom ïalehkai, hynrei ka la mad ïa ka jingshah rem kaba 11 sien lynter bad mynta ka dang ïai sah ha ka kyrdan sha trai ryngkat 3 point.
Ka jingïalehkai ha ka Sngi Ba-ar kan long hapdeng ka Nongrim Hills SC pyrshah ïa ka Laitkor SC ha ka por 2:30 nohphai sngi. Ka Laitkor ka la don mynta ha ka kyrdan ba san ryngkat 16 point, katba ka Nongrim Hills ha ka kyrdan hynñïew ryngkat 13 point.