Liem ka Manchester United ha ka Palace, jop ka Tottenham ïa ka Brentford

Shillong, Rymphang 03

Ka Manchester United ka la mad biang ïa ka jingshah rem ha la ïing ha ka Crystal Palace da 2-0 kol ha Old Trafford ha ka Sngi U Blei, katba ka Tottenham ka la jop da 2-0 kol ïa ka Brentford na ka bynta ban pynïoh mynsiem ïa u Ange Postecoglou.

U Jean-Philippe Mateta u la long u khlur ba kynsai na ka bynta ka Palace, ha kaba u la thep ïa baroh ar tylli ki kol ha ka kylla miet, katba ka United ka la hiar sha ka jingshah rem kaba san na ki hynriew sien ïakhun ha la ïing. Kane ka jingjop ka la pynkiew kyrdan ïa ka kynhun jong u Oliver Glasner kham shajrong ïa ka United kata ha ka kyrdan ba khatar ha ka miej ïalehkai jong ka Premier League.

Ka United ka la sdang ïoh bor lyngba ki lai tylli ki jingjop, hynrei kane ka kynhun hapoh ka jingïalam Ruben Amorim ka la hiar arsut sha ka kyrdan kaba khatlai. Ka rai jong u ban sdang khlem ka jingithuh ïa u rangïalehkai shakhmat ba kynsai da kaba pynshong ïa ki arngut, u Rasmus Hojlund bad u Joshua Zirkzee ka la pynlong ban mad ïa ka jingshah rem.

U rangïalehkai shapdeng ba dang khynnah u Kobbie Mainoo, uba la pawnam bha ha ka jingïalehkai ha ka shiteng taïew pyrshah ïa ka FCSB, u la pyrshang ban thep kol, hynrei um shym la lah ban pynurlong.

Ka Palace, kaba khlem shah rem ha ki hynñiew sien ïakhun ba la dep, ka la duh ei ïa ki ksiar lyngba u Eberechi Eze, uba la biang tang ban mih madan kum u rangïalehkai mihpli. Hynrei u Eze u la ïoh ban shut ïa ka bol ha kaba u Maxence Lacroix u la pyndei da ka khlieh bad ka la plie ïa u Mateta ban pynkhih jar ha ka minit kaba 64.

Ka jingeh jong ka United ka la nangjur shuh shuh namar ba u Lisandro Martínez u la shah pynshong noh namar ka jingmynsaw ha ka khohsiew. Ka Palace ka la pynskhem ïa ka jingjop haba u Daniel Muñoz u la lah ban pynpaw ïa ka bynta kaba shadien jong ka United bad u Mateta u la ïoh ban thep biang ïa ka kol kaba ar jong u ha ka minit kaba 89 na ka bynta ban  khur syndon ïa ka jingjop.

Ha kawei pat ka jingïa -khun ka Tottenham ka la pynkut da ka jingjop namar ka jingïalehkai sniew ka Brentford bad ban khur jingjop da 2-0 kol.

Kane ka nam jop ka la wan urlong hadien ba u rangapkol u Hakon Valdimarsson um shym la lah ban bishar bniah ïa ka corner ba la shut da u Son Heung bad ban pynlong ïa u rangïalehkai ka liang pyrshah Vitaly Janelt ban kum thep hi ha ka minit 29.

Watla ka Brentford ka la pyrshang ban pynphai hadien ba u Yoane Wissa u la ïoh ban pyndei da ka khlieh, hynrei ka Spurs ka la lah ban pynurlong ban thep biang ïa ka kol kaba ar ha ka minit kaba 87 hadien ba u Valdimarsson u la pyndei da ka kjat ïa ka bol ba la shut da u Son.

Lyngba kane ka jingjop ka Tottenham (27 point) ka la jam sha ka kyrdan khatsaw bad ka la tam 10 point na u dak jong ka jingma.