Hadien 14 snem khur takma ka Jylla ha ka National Games lyngba u nongking-lieng na Sumer

Kumba ka paw kane ka long hadien 14 snem ba la Jylla ka la ïoh ban leit shim bynta ha ka 34th National Games ha u 2011.

Shillong, Rymphang 04

Hapdeng ka jingduh jingkyrmen, ka jylla Meghalaya ha ka sien kaba nyngkong eh ka la lah ban pynurlong na ka bynta ban khur kawei ka takma rnong ha ka 38th National Games kaba dang ïaid shaphrang mynta ha Uttarakhand.

Kane ka la wan lyngba u nongking lieng uba na ka shnong Sumer, Ri Bhoi District, u Pynshngaiñ Kurbah ha kaba u la khur ïa katei ka takma ha ka jingïakob king-lieng kynda (Canoeing) ha ka Sngi Ba-ar.

Kumba ka paw kane ka long hadien 14 snem ba la Jylla ka la ïoh ban leit shim bynta ha ka 34th National Games ha u 2011.

Kum ban shu pynpaw hangne haba pyrshang ban wad jingtip halor ka jinglong jingman ki nongïalehkai ka Jylla kiba la leit shim bynta sha katei ka lympung, hynrei kawei kaba pyndiaw mynsiem ka long ba u General Secretary ka Meghalaya State Olympic Association (MSOA), Bah Finely Lad Pariat ha ka Lah Sngi U Blei u la pynpaw ha ki lad pathai khubor ïa ka jingduh jingkyrmen da kaba ong, “Kumno ngin ïoh ban khur takma namar dang ha u snem 2022 tang kane ka Sorkar kaba sdang ban bet symbai bad kumno ngin shu ïoh takma noh?”

Ha kawei pat ka liang kat kum ka kyrwoh ba u la pyllait ha ka Sngi Ba-ar hadien katei ka takma, u Bah Pariat u la ai ka jingïaroh ïa ki shikurim, u Ian Stuart Vincent bad ka Sheila Vincent kiba la shim khia ban saiñdur ïa ki khynnah kiba don ïa ka sap king-lieng na ka thaiñ Ri Bhoi.

Lah ban pynkynmaw ba u Pynshngaiñ, 21 snem ka rta, u la khur ruh ïa ka takma rupa ha ka canoe slalom jong ka Khelo India Youth Games kaba la long ha u snem 2023 bad u la leit shim bynta ruh ha ka ICF World Cup.         

Halor kane ka jingjop, na ka liang u Myntri Rangbah ka Jylla, Conrad K Sangma, u la pynpaw ha ka rynsan social media da kaba ong, “Ka dohnud jong ngi ka dap da ka jingsarong katba u Pynshngaiñ Kurbah u la ïaid lynti ban poi sha ka kyrdan kaba lai ha ka Canoe Men Slalom, da kaba rah ïa ka takma ba nyngkong eh na ka bynta ka jylla Meghalaya ha ka 38th National Games ha Uttarakhand. Khublei shibun, Pynshgaiñ! Ngi sngew sarong shibun eh ïa phi!”