Shillong, Rymphang 04
Ka Sorkar Jylla ka la pynpaw ba ka burom ïa ka rai jong ki dorbar shnong ban pynlong da ka jingïalap ilekshon ha kajuh rynsan lane ka ‘Common Platform’ na ka bynta ka ilekshon MDC, bad ki seng saiñpyrthei ki lah ruh ban pynlong ïa ki jingïalang paidbah hadien ba ki la ïoh jingbit.
U Commissioner & Secretary ka tnat District Council Affairs (DCA), Bah Cyril V.D Diengdoh (IAS), u la kubur ba ka la don ka jingujor da ki katto-katne ki seng saiñpyrthei ba kim ïoh jingbit ban pynlong ïa ka jingïalang paidbah ha ki shnong. Halor kane ruh na ka liang ka tnat DCA ka la bthah ïa ka Deputy Commissioner (DC) ban ïakren bad ki Rangbah Shnong jong baroh ki shnong, ba ki dei ban ailad ban pynlong ïa ki jingïalang paidbah ban ïalap na ka bynta ka ilekshon khnang ba kan long ka ilekshon kaba khuid bad laitluid, hynrei u la bynrap ba kata ka dei ban long hadien ba ki la ïoh jingbit shwa katkum ki kyndon.
Une u heh ophisar u la ong ba ka Sorkar ka la kren shai ba ki don ki shnong kiba la rai ban pynlong beit da ka jingïalang ha kajuh rynsan ïa baroh ki kyrtong. Kumta la ai jingbit ban pynlong ïa ki ‘Common Platform’, namar ha kum kine ki rynsan la ailad lut ïa baroh ki seng saiñpyrthei bad ki kyrtong shimet ruh ban pynsngew ïa ki nongrim bad ki mat jong ki.
Haba kylli, u Bah Diengdoh u la ong ba lada ki shnong ki la rai ba kin buh beit tang ka ‘Common Platform’ kum ka rynsan ïalap ilekshon ka Sorkar kam don eiei ban ong, namar ka dei ka rynsan kaba ailad lang kumjuh ïa baroh ki kyrtong kynthup ïa ki kyrtong shimet.
Lah ban kdew ba ka Voice of the People Party (VPP) ka la ujor sha ka tnat DCA jong ka Jylla halor ka jingpynsngew ki dorbar shnong ban pynlong beit tang da ka jingïalap ha kajuh rynsan ha kane ka ilekshon. Kane ka jingujor jong ka VPP ka long halor ka rai jong ka Mawlai Town Dorbar (MTD), halor ka nongrim kan ym ktah ïa ki samla kiba ïakhun ïa ki eksamin bapher-bapher.
