Pynkhreh ka NEUFC ïa ki jingïalehkai ISL ha Shillong, la Sngi Thohdieng ïa ka Mumbai City

Kiwei pat ki jingïalehkai kin long pyrshah ïa ka Bengaluru FC ha ka 21 tarik bad ïa ka East Bengal FC ha ka 8 tarik u Lber.

Shillong, Rymphang 04

Ka NorthEast United FC ka la long ba la khreh na ka bynta lai tylli ki jingïalehkai ha la ïing jong ka Indian Super League (ISL) kiba la thmu ban pynlong ha ka nongbah Shillong.

Kane ka kynhun hapoh ka jingïalam u Juan Pedro Benali kan ïakhun nyngkong pyrshah ïa ka Mumbai City FC ha ka Sngi Thohdieng (7 tarik) ha Jawaharlal Nehru Stadium, Polo ha ka por 7:30 mynmiet.

Kiwei pat ki jingïalehkai kin long pyrshah ïa ka Bengaluru FC ha ka 21 tarik bad ïa ka East Bengal FC ha ka 8 tarik u Lber. Te kumta la khmih lynti ba ki paidbah nongkyrshan kin wan ban sakhi ïa kitei ki jingïalehkai khamtam ïa ki rangïalehkai kiba kynthup ïa u Sunil Chhetri, Lallianzuala Chhangte bad u Naorem Mahesh Singh.

Shwa ka jingïalehkai ka ban long ha ka Sngi Thohdieng, u CEO ka NorthEast United FC u Mandar Tamhane u la pynshai halor kumno ka jingleit jong ka klob sha Shillong ka la jia lyngba ka jingmih ki paidbah ka nongbah Shillong kiba la pyndap ïa ka stadium ha kine khyndiat bnai ba la dep. “Haba ngi ïalehkai ïa ka semi final ha ka Durand Cup pyrshah ïa ka Shillong Lajong hangne, ka la long ka jingplie ïa ki khmat jong nga wat la nga la don bynta ha ka phutbol India la 25 snem kynthih. Ïa ki tiket ‘online’ la die lut hapoh 12 minit. Ki jaka peitkai shabar ha ki distrik bapher bapher ruh ki la dap da ki paidbah. Ngi dei ka klob kaba mihkhmat ïa ki phra tylli jylla bad ngi la ju kwah ban wanrah ïa ka phutbol sha ki bynta jong ka thaiñ shatei lammihngi. Haba ïohi ïa ka jingkynthoh kaba ngi la ïoh na ka bynta ka Durand Cup, la pynskhem biang ïa ka rai jong ngi ban wan sha Shillong mynta kane ka samoi ISL.”

“Shisien ba ngi la thikna ban wanrah ïa ka ISL sha Shillong ha kane ka samoi, ngi la ïatreilang bad ka Sorkar Meghalaya, kiba ju ai ka jingkyrshan bad ïasam lang ïa ka jingthmu jong ngi ban pynlong ïa ka Shillong kum ka nongbah phutbol jong ka ri India,” u la bynrap.

U rangïalehkai shakhmat ka NorthEast United u Redeem Tlang uba na kane ka Jylla, u la long uwei na ki rangïalehkai ba paw ha ka ISL. Da ka jingïalehkai palat 100 sien ha ka ISL bad ka bynta ba kongsan ha ka jingjop jong ka NorthEast United FC ha ka Durand Cup ha u snem 2024, u Tlang u dap da ka jingkmen halor ka jingwan jong kane ka lympung ha kane ka nongbah.

“Ka dei ka por kaba kyrpang bha na ka bynta jong nga shimet bad ruh na ka bynta ki paidbah ka Meghalaya ban sakhi ïa ki jingïalehkai ISL ha Shillong,” ong u Tlang haba kren sha ka ISL. “Ka ISL ka dei ka league kaba ha khlieh duh ha ka ri bad ban ïoh ïa ka ban wanrah sha ka ïing jong phi ka dei ka jingsngew kaba ym lah ban mutdur. Ki briew ha kylleng ka jylla Meghalaya ki long kiba ïeid bad sngewtynnad bha ïa ka phutbol. Nga kyntu ïa ki ban ai jingkyrshan ïa ngi haba ngi ïalehkai hangne. Ngi kwah ba kin ai mynsiem ïa ngi naduh kaba sdang haduh kaba kut.”

Ka jingïaid lynti ha ka kam ïalehkai phutbol jong u Redeem Tlang ka la sdang na ka Shillong Lajong FC ha u snem 2013, hynrei ïa ka jingïeit jong u ïa kane ka jingïalehkai ka la rung ha u naduh ka rta dangrit lyngba ka jingkyrshan da ka ïing ka sem jong u. U Tlang u la pynpaw ba ha ka por ba u dangrit u la shim ïa kane ka jingïalehkai tang kum ka jingkmen ha u. U la ong ba ka phutbol ka la rung jylliew bha ha ka kolshor jong ka nongbah Shillong, ha kaba ki briew ha baroh ki rta ki ïalehkai ïa kane ka jingïalehkai ha man la ki jaka jong kane ka Jylla la ha sor na ha nongkyndong.

“Ka phutbol ka long kum ka niam ha Shillong. Ka dei ka jingïalehkai kaba nyngkong eh kaba phi ïalehkai ynda phi la san hangne. Phi lah ban leit sha kino kino ki bynra jong kane ka nongbah bad ba ïohi ïa ki briew jong baroh ki rta kiba ïashim bynta ha kane ka jingïalehkai. Nga la sdang ïa kane ka jingïalehkai bad la u kni manla ka taïew bad nga da sngewtynnad shisha,” la bynrap u Tlang.

Kumba ka long mynta ka NEUFC ka la don ha ka kyrdan basaw ryngkat 29 point na ki 19 sien ïakhun.