United Nations, Rymphang:
Ka India ha kane ka kynti ka la ioh ban siew haduh USD 37.64 Million Dollar sha ka mang tyngka ba man ka por jong ka United Nations na ka bynta u snem 2025, da kaba rung ha ka “Honour Roll” jong 35 tylli ki dkhot ri kiba la siew ia ka jingkheiñ- jingdiah jong ki ha ka mang tyngka ba man ka por ha ka UN bad ha ka por kaba biang.
Katkum ka jingong jong ka UN halor ki jingnoh synñiang, haduh ka 31 tarik u Kyllalyngkot 2025, ki don 35 tylli ki ri ba la siew pura ïa ka jingkheiñ mang tyngka ba man ka por jong ki hapoh ka por ba la buh kaba 30 sngi ba la kdew ha ki kyndon pisa tyngka jong ka UN.
Ka India ka la noh synñiang haduh USD 37.64 million sha ka mang tyngka ba man ka por jong ka United Nations 2025 bad ka la siew ha ka 31 tarik u Kyllalyngkot 2025.
Haba jer kyrteng ïa ki ri kiba rung ha ka “honour roll” jong ki dkhot ri ba la siew pura ïa ki jingkheiñ jingdiah jong ki ha ka mang tyngka ba man ka por, u Stephane Dujarric, Nongaiktien jong u Secretary-General Antonio Guterres, u la ong ha ka Sngi Nyngkong ha ka jingïalang bad ki nongthoh khubor ba man ka sngi ba ka United Nations ka ai khublei ïa ki paralok jong ka na India naba ka India ka ju long napdeng ki ri kiba siew ia ki jingnoh synñiang jong ka sha ka mang tyngka jong ka UN ha ka por bad ha ka rukom kaba pura.
Mynshem taiew, u President ka UN General Assembly, Philemon Yang, u ban sa wan jngoh ia ka ri India ha ka 4-8 tarik u Rymphang, u la ong ha ka jingiakren bad ki lad pathai khubor ba ka India ka dang iai bteng hi ban pyndep ia ka jing-kitkhlieh jong ka kum ka ri dkhot jong ka UN da kaba siew ia ka mang tyngka jong ka baroh kawei ha ka por kaba biang.
