Shillong, Rymphang 05
Hadien ba u Pynshngaiñ Kurbah u la khur ïa ka takma rnong kaba nyngkong eh na ka bynta ka Jylla ha ka 38th National Games ha Uttarakhand, ka Sorkar Jylla ka la wan shakhmat ban tyrwa da ka kam sorkar bad kan pynkup burom da ka song pisa kaba T. 1 lak tyngka ïa une u nongking-lieng uba na Lawbyrwa kaba ha Sumer, Ri Bhoi District.
Haba pyllait lyngba ka durkhih ha social media ha ka Sngi Balang, u Myntri Rangbah ka Jylla, Conrad K. Sangma u la ïoh ban ïakren ïa u coach Ian Stuart Vincent bad kumjuh ïa u Pynshngaiñ Kurbah, da kaba u la ai khublei kyrpang halor kane ka jingjop ka jong u ha ka jingïakob king-lieng kynda (Canoe Men Slalom) ha ka Sngi Ba-ar.
U Conrad u la ai khublei ruh ïa ki shikurim kata ïa u Ian Stuart Vincent lem bad ka Sheila Vincent kiba la trei shitom ban kyntiew ïa kane ka jait jingïalehkai kaba dang thymmai hapoh kane ka Jylla naduh ba la seng ïa ka ha u snem 2023.
Ha kane ka jingïakren lyngba katei ka durkhih, u Conrad u la pynpaw ha ki ba ynda ki la wanphai sha kane ka Jylla, ka Sorkar kan pynkhreh ban tyrwa da ka kam ïa u Pynshngaiñ uba dang 21 snem ka rta, khnang ba kan long ka jingkyrshan ïa u bad ruh ba un nang lah ban pynjanai shuh shuh ha kane ka jait jingïalehkai.
“Ynda phi la wanphai sha la ïing ngin sa pynkhreh ïa ki kot ki sla na ka bynta ka kam sorkar kaba long shi bynta jong ka Meghalaya Sports Policy bad kane ka dei ka sien ka nyngkong kaba la lah ban pynurlong kat kum ki mat treikam jong kane ka policy,” la bynrap u Conrad.
Ha kawei pat ka kyrwoh ba la pyllait da u Commissioner and Secretary ka tnat ïalehkai ka Sorkar Jylla, la ong ba ka la pynkhreh da ka khusnam pisa kaba T. 1 lak tyngka lem bad ka Sports Scholarship Scheme kaba T. 70,000 tyngka ïa utei u nongking-lieng ka Jylla.
