Shillong, Rymphang 05
U Bah Disparsing Rani, uwei na ki nongwad Right To Information (RTI), u la pynpaw ïa ka jingsngew bynñiaw halor ka jingpyntreikam ïa ka Right to Information Act ha kane ka Jylla ba ka dang dkoh bha. Kane ka jingdkoh ka dei namar ka jingbym shim khia bad ka jingleh bym suitñiew jong ki Public Information Officers (PIO) kiba dei ban ai ïa ki jingtip kiba hok sha ki paidbah.
U Bah Rani u la pynpaw ruh ïa ka jingsngewbitar ba wat ka shlem treikam jong u Governor ruh kam pynhun ïa ki nongwad RTI haba ki pan jingbit na ki tnat treikam bapher bapher jong ka Sorkar India haba u phah ïa ka shithi pyntip ban leh eiei, katba ha kane ka Jylla pat kim leh kumta. U Bah Rani u la kynnoh ba kane ka dei namar ka jingjaboh jong ki PIO kiba la buhrieh ïa ki jingtip ba ki dei ban ai sha ki paidbah.
Ha ka jingïakren bad ki nongthoh khubor, u Bah Rani u la wanrah ïa ki RTI kiba u la pan halor ka jingpyntrei kam ïa ka ‘Smart City Project’ ïa kaba kiba bun ki kam la pyntrei da ki kompani nabar bad u la buh ka jingkylli da kaba ong, hato kine ki kompani ki la ïoh ne em ïa ki trading license na ka district council?
U Bah Rani u la pyntip ba katkum ka jubab na ka RTI ba u la ïoh na ka ‘Department of Housing and Urban Development’ ka jingpyntrei ïa ki kam jong ka ‘smart project’ kaba kynthup naduh ka jingtrei ïa ka ‘Commercial Complex’ kaba ha Polo, ka jingpyntrei ïa ka ‘Shillong Business cum Tourism and Cultural Center kaba ha Khyndai Lad ïa kaba la pyntrei da ka M/s Badirai and Company bad kiwei kiwei pat ki kam la pyntrei da ki kompani nabar ka jylla.
U Bah Rani u la pynpaw ruh ïa ka jingsngew lyngngoh ïa ka jingdaiñ kuna ki pulit ïa ki taksi ki bym tah ‘sticker’, bad u la ong ba kane ka long khongpong pynban ba ki kyndon treikam jong ka Motor Vehicles act 1998.
U Bah Rani u la pynpaw ruh ba ka jingleh jong ki pulit ka jylla ha ka ban daiñ kuna na ki kali taksi kan wanrah jingeh ïa ki paidbah bad kumjuh kan ktah ïa ki nongñiah taksi ha ka Jylla.
