Nongstoiñ, Rymphang 05
Ka kynhun ïalehkai jong ka Mawlarshong SC ka la ïoh jingjop ha ka Super Division jong ka NDSA Premier League Football Tournament 2024-25, katba ka Mawkawah SC ka la ïakhaid bad ka Tiehsaw Pengkyllut khlem don mano-mano ba ïoh ban thep kol.
Kane ka nam jop jong ka Mawlarshong SC ka la wan hadien ba ka la lah ban pynliem noh da 4-0 kol ïa ka kynhun ïalehkai jong ka Mawïong Pyndengrei ha ka jingïalehkai kaba la long ha ka Sngi Balang ha madan New Nongstoiñ.
Shuh shuh, ïa kitei saw tylli ki kol jong ka Mawlarshong la ïoh ban thep da u Donkupar Marngar ha ka minit kaba 25, kumjuh u Wantiplang Syiem u la thep ar kol ha ka minit kaba 83 & 90+, katba ïa ka kol kaba saw bad khatduh la thep da u Hopeful Wanñiang ha ka minit kaba 89.
Haba phai pat sha ka jingïalehkai jong ka Third Division hapdeng ka Laiskseh bad ka Laitphlang ka la kut da ka jingïakhaid mar 2-2 kol ha ka madan NDSA kaba ha Nongpyndeng, katba ka kynhun ïalehkai jong ka SSS Sohparu ka la ïoh jingjop da ka walk-over namar bym wan mih madan jong ka kynhun Mawthengsynga.
Na ka liang ka Football Committee, ka NDSA ka la pyntip ba ka jingïalehkai jong ka Super Division ha ka Sngi Palei kan long hapdeng ka Pyndengrei SCSC pyrshah ïa ka Mawliehbah SC ha ka por 2 baje nohphai sngi ha madan New Nongstoiñ.
Shuh shuh ka la pyntip ruh ba ka jingïalehkai ha ka First Division kan sdang ha kajuh hi ka sngi hapdeng ka Nongpyndeng SS&CC pyrshah ïa ka Jaidoh YSA ha ka por 11:50 mynsngi ha madan New Nongstoiñ.
