Shillong, Rymphang 05
Ka shnong Sohbar ka dei ka jaka kaba pawnam na ka bynta ki khanatang hyndai khamtam ha kaba pynneh pynsah ïa ka mariang, ki khlaw ki btap bad ki jingitynnad kiba har rukom.
Ka shnong Sohbar ka long kaba pawnam ha ka histori jong ki phareng naduh ka jingsynshar ki dohlieh. Ka khubor kaba sngewtynnad ka long ba ki trai shnong ki la pynneh-pynsah ïa ka dustur lehkhuid bad ïa ki kam ba ki ju trei ha ki lyngkha lyngba ka tamasa.
Ka tamasa ïa kaba la tip kum ka Sohbar Tourism Festival kaba ju long man la u snem ha kaba mynta u snem ruh, ka Sohbar Cultural Tourism Society ka la pynlong ïa ka tamasa Lariti Festival ban ïathuhkhana ïa ka jingim jong ki briew ka Sohbar kiba don bynta ha ka rep-ka riang kum ka jingrep ‘Latyrpad bad ban pynneh-pynsah ïa ka khlaw-ka btap.
Ïa kane ka tamasa la pynlong ha ki lai sngi lynter kata naduh ka 30 tarik Kyllalyngkot haduh ka 1 tarik Rymphang 2025 da ka Sohbar Cultural Tourism Society hapoh ka jingïalam jong u Chairman, Bah KS Lyngskor uba dei ruh u Sordar ka Ilaka Sohbar bad u Secretary, u Bah C. Shullai.
Ïa kane ka prokram la pynlong ha ka khlaw Biodiversity, Khlieh Umlang Sohbar, East Khasi Hills District. U Professor Desmond Kharmawphlang uba dei u heh jong ka tnad Creative Folklore u la don bynta ha ka ban plie bad ban ai ïa ki sabut bad ki kot-ki sla ba u la lum ïa ki pateng jong ka shnong bad ïa ki dur lyngba ka jingwad bniah na ka tnad Creative Folklore, NEHU.
Ha ka sngi ka tamasa Lariti, katkum ka dustur ki nong Sohbar, ki la leit sha lyngkha ban kheit latyrpad bad ki la lum ïaki ha kaba u Professor Desmond Kharmawphlang u dei uwei na ki riew shemphang uba ju wan jngoh na ka por sha ka por.
Ka Lariti Festival kan don ka jingpynitynnad ïa ka shnong Sohbar bad ka jingïakop na ka bynta ki nongshong shnong kaba kynthup ïa ka jingïakop dro dur ïa ka mariang bad ka kolshor jong ka thaiñ Sohbar bad ka jingïakop rwai phawar ha ka sngi plie.
U Professor Desmond Kharmawphlang haba batai ïa ka pasoh jong ka shnong Sohbar u la ong ba kawei na ki jingthmu jong ka shnong Sohbar ka dei ka put ka tem, ka rwai ka siaw bad ka shad-ka kmen.
U la ong ba ka Hynñiewtrep Hynñiewskum lyngba ka Shnong Sohbar bad ka thaiñ Sohra ka la kylla long kawei na ki jaka shongkai kaba itynnad tam ha ka pyrthei bad ka la long kum ka ïing jong ki sim, ki khniang bad kiwei-kiwei ki jait jingthaw.
“Kane ka dei ka par ksiar kaba u Blei u la ai ha ki nongïoh pateng ban ri ban sumar bad ban pynneh-pynsah ïa ka mariang. U briew um lah ban lait na ka sawdong-sawkun jong ka mariang bad u khun bynriew um lah ban lait na ki riti ki dustur kiba ai kamai lyngba ka mariang na ka bynta ka bam ka dih”, ong u Professor Desmond.
