Jakarta, Rymphang:
U jumai uba khlaiñ haduh kumba 6.2 Magnitude u la pynkhynñiuh ia ka bynta jong ka rud duriaw Indonesia sha ka phang Shatei jong ka Maluku ha ka Sngi Balang. Une jumai ba ka jingjylliew ka long palat 81 Km lane kumba 50 Mile hynrei kaba lyngngoh ka long ba kim shym don kino- kino ki dak jong ki ‘eriong ne ‘erlangthari wat ha shwa ka jingwan pynkhynñiuh jong utei u jumai ha katei ka sngi.
Tad haduh ba la pynmih ia kane ka khubor ha ka step Sngi Balang, ym shym la ioh jingtip ban don kiba khlad ne kiba shah ktah ha utei u jumai ha katei ka sngi hynrei ki bor pyniaid ka Indonesia ki dang phah wad bniah ban ioh jingtip la ki don kiba shah ngat ha utei u jumai.
Namar ka Indonesia ka don ha ka bynta jong ka pyrthei kaba ki ju khot ka ‘Pacific Ring of Fire’ bad kaba long ruh ka bynta jong ka pyrthei kaba ju kloi bha ban mad ia ki bor jong ka mariang khamtam ia u jumai bad ka jingbthei jong ki Lum Mihding.
