Jowai, Rymphang 05
Ka Lamin XI SCC ka la long ka lahduh ha ka Upper Division bad ka Padu United kum ka lahduh ha ka Lower Division Football League ba la pynïaid da ka Amlarem Sub Divisional Sports Asso ciation (ASSA).
Kane ka nam jong ka Lamin IX bad ka Padu United ka la wan hadien ba ki ïoh jingjop ha ki jingïakhun phainal ba la pynlong ha ka Sngi Balang ha madan ïalehkai Jarain.
Ha ka jingïalehkai phainal ha ka Upper Division, ka Lamin XI SCC ka la lah ban pynliem noh ïa ka Sohlawiat SC da 5-3 lyngba ka tie-breaker hadien ba ka jingïakhun ha ka por ba la buh ka la kut noh da ka jingïakhaid mar 1-1 kol.
Kumba ka paw kane ka jingïalehkai ka la long kaba itynnad bad kaba ïakhaid bha ha kaba baroh ar kynhun ki la pyrshang ban ïakhun tyngeh naduh kaba sdang. Ka Lamin ka la ïoh ban pynkhih jar nyngkong eh lyngba u Lakhon Lamin ha ka minit kaba 40, hynrei ka Sohlawiat ka la lah ban pynïakhaid shwa ban wai lyngba u Lapynbiang Khonglah ha ka minit kaba 80.
Katba ha ka Lower Division, ka Padu United ka la pynliem noh ïa ka Padu Mawsku da 1-0 kol bad ïa kane ka kol la thep da u Banjop Pohlong ha ka minit kaba 44 kaba la biang pura ïa kane ka kynhun ba kan rah ïa ka nam lahduh ha kane ka aïom ïalehkai.
Hadien ka jingïalehkai la sam khusnam sha ki kynhun lahduh kumjuh ki kynhun ba wan ba-ar ha ka jingdonlang ki nongïalam bad dkhot nongkitkam ka ASSA kynthup ïa u Wansuk Lamin, Wor-king President, Bah Dapmon Tariang, General secretary, Bah Shngaiñ-lang Suting, Sport Secre -tary nalor kiwei pat.
Kumta, ka Lamin IX SCC kum ka lahduh ka la ïohpdiang ïa ka song pisa kaba T. 60,000 tyngka, katba ka Sohliwiat kaba wan ba-ar ka la ïoh T.30,000 tyngka ryngkat ka trophy. Ka Padu United kaba la long ka lahduh ha ka Lower Division ka la ïoh ïa ka song pisa kaba T.40,000 tyngka katba ka Padu Mawsku ka la ïoh T.20,000 tyngka ryngkat ka Trophy.
La sam ruh ïa ki khusnam shimet sha ki rang-kynsai ha ka Lower Division ha kaba ïa ka nam Top Scorer la ïoh da u Banjop Pohlong, Best Goalkeeper sha u Dibor-lang Langshiang bad ka nam Man of the Match la ïoh da u Pynskhem Mukhim. Kine baroh ki dei na ka Padu United.
Ha ka Upper Division ïa ka nam Top Scorer la ïohpdiang da u Fullme Khonglah Sohliwiat SC, Best Goal keeper ka leit sha u Laiky Khonglah na Lamin XI bad ka nam Man of the match la ïohpdiang da u Lakhon Lamin na Lamin XI.
