Tehran, Rymphang:
Katkum ka kaiphod ba thymmai ba la pynmih da ka National Council of Resistance of Iran (NCRI), la ong ba ka Iran ka dang shna buhrieh ïa ki namding ‘nuclear’ kiba lah ban siat pynpoi shaduh sha Europe da kaba pynshong nongrim ïa ki jingshna ba la aiti sha ka sorkar Islamic da ka North Korea.
Ïa kine ki tiar la pynmih ha ki 2 tylli ki jaka ba la pynkylla dur kum ki jaka pynher ‘Satellite’. Ka NCRI, ka kynhun pyrshah kaba la shah beh shnong, ka la ong ba ka Iran ka la ialeh ban pynstet ia ki rukom treikam jong ka bad la bna ruh ba ka don ia ki tiar ïakhun thma ‘nuclear’ ha kine ki jaka. Ka la pynpaw ruh ba kitei ki namding, ki lah ban poi haduh palat ia ka 3,000 km (1,800) mile ka jing jngai bad uba lah ban ktah ia ka Europe.
Ka NCRI ka la buh lama ha kawei na ki jaka ban pyntreikam kum ka jaka shna tiar ‘nuclear’ kaba long ka jaka shna ia ki namding ‘Shahrud’, kaba hapoh ka jingkhmih jong ka Organisation for Advanced Defense Research & Islamic Revolutionary Guard Corps (IRGC) jong ka Iran.
Ka la antad ruh ba ka Iran ka la dep ban test ïa ki tiar ‘namding ha ka jaka pynbthei jong ka ‘Shahrud’ ym duna ïa ka 3 sien. Ia kita ki jingpynher ‘namding la kynnoh ba la buhrieh kum shi bynta jong ka jingpynher ‘Satellite’. La ngeit ruh ba ka IRGC ka thmu ban ban pynher shuh- shuh sa ia kiwei pat ki jait ‘namding ‘Ghaem’ kiba kham khlaiñ bor shuh- shuh ha kine ki bnai ban wan.
