Shillong, Rymphang 05
U Chairman jong ka Meghalaya State Pollution Control Board (MSPCB), u R. Nainamalai, IFS, u la pyntip ba ki bor pynïaid jong ka Board ha ryngkat bad ka jingïatreilang bad ka ophis jong u Deputy Commissioner ka Ri Bhoi District ha ka 4 tarik Rymphang, 2025, ki la leit ban khang khyrdep noh ïa kumba 6 tylli ki karkhana pynmih tdem jaboh kiba don ha ka Export Promotion Industrial Park (EPIP), Byrnihat namar ka jingbym bud ryntih ïa ki kyndon Aiñ ba la buh da ka Board bad ka jingbym lah ban tehlakam ïa ka jingmih ka lyer jaboh na kine ki karkhana.
Kitei ki hynriew tylli ki karkhana kiba la shah khang khyrdep noh ha katei ka sngi ki kynthup ïa ka Shyam Century Ferrous Ltd. (Ferro Alloy), ka Khasi Alloys Ltd. (Ferro Alloy), S R (India) Bio Products Pvt Ltd (Re rolling mill), Pawan Castings Meghalaya Pvt. Ltd. (Re-rolling mill), F W Ferrotech Pvt. Ltd (M S Ingot and Re rolling mill) bad ka Nalari Ferro alloys Pvt.Ltd. (Ferro Alloy).
Ha ka jingïoh ïakren bad ki lad pathai khubor ha ka 5 tarik Rymphang, 2025 ha ka ophis treikam u Chairman ka Meghalaya Pollution Control Board, u R. Nainamalai, IFS, kaba don ha Lumpyngngad, u la ong ba ki don 41 tylli ki karkhana ha ka thaiñ Byrnihat ha kaba napdeng kine 5 tylli ki dei kiba hap hapoh ka ‘Red Category’ lane kiba pynmih shibun ka jingjaboh kaba ktah ïa ka mariang, 22 tylli kiba hap hapoh ka ‘Orange Category’ lane kiba pynmih kham duna ka jingjaboh kaba ktah ïa ka mariang, 14 tylli kiba hap hapoh ka ‘Green Category’ lane ki karkhana kiba duna bha ban pynmih ïa ka jingjaboh.
U la ong ba napdeng kine ki 5 tylli ki karkhana kiba hap hapoh ka ‘Red Category’, 3 tylli ki karkhana ki dei ki bym treikam shuh bad 2 tylli pat ki dei kiba dang treikam hynrei namarba kitei 2 tylli ki karkhana ki khlem ïoh ïa ka jingbthah halor ki kyndon bad ki Aiñ kiba dei ban bud pyrkhing, kumta u la ong ba na ka liang ka Board ka la phah da ka jingthoh sha kitei ki karkhana ha kaban yn sa aipor hapoh ka 15 sngi ba kin ai ïaka kaiphod jubab jong ki.
Halor ka jingmih ha ki lad pathai khubor ba ka Byrnihat ka hap hapoh ka thup kum ka jaka kaba jaboh tam hapoh ka Ri India, u Nainamalai, u la ong ba kito ki jaka ba hap ha katei ka thup ki dei kiba la shim naka jingthew jong ka Continuous Ambient Air Quality Monitoring kaba don hapoh ka Assam.
U la ïathuh ruh ba ïa ka Shyam Century Ferro Alloys Private Limited la daiñ kuna T. 4 lak bad T. 2 lak ïa ka Khasi Alloys Private Limited.
U la ïathuh ba ïa kiwei pat ki karkhana khlem shym la daiñ kuna satia namarba ki la kohnguh ïa ki jingbthah jong ka Board ban khang noh mardor ïa ki karkhana jong ki.
“Kiwei ki karkhana ki la kohnguh ïa ka jingbthah jong ka Board, kumta ngi khlem daiñ kuna ïa ki”, ong u Chairman ka Board.
U la ong ruh ba ka jingshah khang jong kitei ki karkhana ka dei hadien ka jingleit jurip kaba manla ka por da ki bor ba dei khmih ïa kitei ki karkhana bad lyngba ka kaiphod ba la ïohpdiang, na ka liang ka Board ka pynmih ïa ka hukum ban phah khang noh ïa kitei ki karkhana bad ong ruh ba hashwa ba kin phah khang ïa kine ki karkhana ki la dep ban pyntip shwa sha ki bor pynïaid District bad hadien kata pat, kin sa phah khang noh ïa kine ki karkhana.
