Shillong, Rymphang 05
U nongïalam ka United Democratic Party (UDP) bad Myntri ka Sorkar Jylla, Bah Paul Lyngdoh ha ka Sngi Balang u la pynkynmaw biang ba u long uwei napdeng ki nongmihkhmat uba pyrshah ïa ka ‘Resolution’ halor ka ‘Article’ 371 kaba la wanrah da u Bah Ardent M. Basaïawmoit ha u snem 2015.
“Kan kham shai ïa ki paidbah lada ki pule ïa ki ‘Record’ jong ka ‘Assembly Library’ bad kin lap ïa ka ‘Resolution’ ba la wanrah da u Bah Ardent M. Basaïawmoit ban pyntreikam noh ïa ka ‘Article’ 371 hapoh ka Jylla ha ka snem 2015,” ong u Bah Lyngdoh.
Haba kdew ba u Bah Basaïawmoit u la wanrah ïa kane ka mat ban ïatai hapoh Ïingdorbar Thaw-aiñ, u la ong u dei uwei napdeng kito kiba la ïashim bynta ha katei ka jingïatai ban pyrshah ïa kane ka jingtyrwa jong u Bah Basaïawmoit ban wanrah ïa ka ‘Article’ 371.
“Nga sngew ba namarba ka Khyrnit ba 6 ka la khlaiñ lypa bad ka la ïada ïa ngi…ngim lah ban pdiang ïa ka ‘Article’ 371. Kata ka dei kajuh ka nongrim kaba u CEM barim ka KHADC, Bah H.S. Shylla ruh u la kren bad lada phi pule ïa ki ‘Record’ jong ki jingïatai hapoh Ïingdorbar Thawaiñ ha u snem 2015, nga ruh nga la kren ïa kane ka bynta,” ong u Bah Lyngdoh.
Na ka liang jong u, u la ong ruh ba ka aiñ kaba khlaiñ bor ka Sorkar Pdeng – Citizenship Amendment Act (CAA) kam lah ban treikam ha ka Jylla halor ka nongrim ba ha ki jaka, lait na ki 3 tylli ki ‘Normal Area’ hapoh sor Shillong, baroh ka Jylla ka dei ka ‘Schedule Area’.
“Kumno ki kylla ‘Schedule Area’…namar ki dei ki jaka kiba hap hapoh ka jingïada jong ka Khyrnit ba 6. Ban khura ïa kata te ka long kumba pynpra ïa u mawnongrim jong ka ïing,” u la ong.
Haba ban biang halor katei ka bynta, une u nongïalam u la ong ba ha ki Jylla kiba ka ‘Article’ 371 ka treikam, ka Khyrnit ba 6 kam treikam shuh.
U Bah Lyngdoh u la bynrap, “Ha ki Jylla kum ka Mizoram kaba la kdup hapoh jong ka Article 371, ki District Council kiba don hangto ki dei noh na bynta kiwei pat ki jaidbynriew – ki don 3 tylli ki ADC ha Mizoram bad kine ki dei ki ADC jong kiwei pat ki jaidbynriew, lait noh ki Mizo namar ïa ki Mizo la kdup da ka ‘Article’ 371.”
Ha kawei pat ka bynta, haba jubab, u la ong, “Ka long shai ba ka Council na man ka ‘Finance Commission’, ka wan ka jingkyrshan pisa kaba wan beit sha ki District Council. Kum kane ka ïing kaba ngi don mynta ka ban sa kut noh…ïa ka jingkyrshan pisa na ka tnad Sorkar Pdeng, ka wan beit lyngba ka ’15th Finance Commission’.”
Nalor kata, u la ong ba ka Council ka pynmih khajna ruh nalade kum na ka liang ka ‘Building Permission’, jingpynthymmai ïa ki ‘Trading License’, ka jingpynrung kyrteng ïa ki jaka bad kiwei.
“Kine baroh ki dei ki kam kiba pynmih khajna ïa ka Council bad na kine ruh la lah ban pynkylla sha ka jingkyrshan pisa na bynta ki MDC kynthup ïa ka ‘Discretionary Grant’ kaba poi sha ka Council,” u la ong.
