Shillong, Rymphang 05
Wat la u Pynshngaiñ Kurbah, 21 snem ka rta, u pang ka kjat naduh ba u mih na la ïing hynrei um shym la duh jingkyrmen namar da ka jingtrei shitom u la ïoh ban rah ïa ka takma rnong ha ka jingïakop kinglieng kaba la tip kum ka Men’s Slalom K1 Event ha ka National Games 2025 kaba 38 kaba la long ha ka 4 tarik u Rymphang kaba dang ïaid mynta ha Jylla Uttarrakhand.
U Pynshngaiñ u dei shnong trai na Lawbyrwa kaba hap ha Umsning C&RD Block, Ri Bhoi District. U dei u khun khatduh napdeng shiphew ngut shipara jong u Bah Hister Nongbsap bad ka Kong Sirit Kurbah kaba wan na ka longïing baduk.
Ban tip kham bniah ïa ka jingïaid lynti jong u samla Pynshngaiñ Kurbah haba u la ïoh rah ïa ka takma rnong ha ka National Games kaba 38, u nonglum khubor jong U Nongsaiñ Hima na Shillong u la leit ïakynduh kyrpang ïa ka kmie bad u kpa ryngkat ka jingïadonlang ki bahaïing bahasem ha shnong Lawbyrwa kaba ïaid lynti na Sumer.
Ynda u nonglum khubor u la poi sha ïing jong u Pynshngaiñ, la lap ba kane ka longïing ka long kaba duk namar ki sah ha ka ïing ba lai kamra bad tap da ka tin.
Haba ïoh ban ïakren bad ka kmie u kpa ki la ïathuh ba ki dei tang ki nongrep ban pyndap ïa ka ïing ka sem.
Ki la pynpaw ka jingsngewkmen namar ki khlem poi pyrkhat ba u khun jong ki un wanrah burom ïa ka ïing ka sem bad jylla ban ïoh rah ïa ka takma rnong ha ka jingïakob kinglieng.
Nalor nangta, ki la ïathuh ba u Pynshngaiñ u don hapdeng ka jingshitom ka kjat naduh ba u mih na la ïing bad mynta ruh u dang tah dawai beit haba u la dep ïa ka jingïakob kinglieng.
Shuh shuh, ki la ïathuh ba u Pynshngaiñ u la sdang ban leit hikai kinglieng naduh ba u dang 14 snem ka rta ha ka wah hajan ka shnong Lawbyrwa kaba tuid na Umïam jong ka MeECL ha ka jinghikai jong ki shikurim kata u Ian Vincent uba na Australia bad ka kurim ka Sheela Vincent.
Haba ïakren bad u Pynshngaiñ lyngba ka phone u la ïathuh ba u pang ka kjat naduh ba mih na ïing hynrei u shu tah dawai haduh mynta ba la kut ka jingïalehkai.
U la ïathuh ba ha ka wat kaba nyngkong u tam ma u ïa kiwei pat hynrei ha ka wat ba ar u la hiar ka jingïoh point namar u shitom ka kjat.
