Shillong, Rymphang 05
U Nongïalam ka NPP ha Meghalaya, Bah Prestone Tynsong ha ka Sngi Balang u la hiar sha ka thaiñ Marmain kaba hap ha Nongpoh Konstitwensi na ka bynta ban pynshai paidbah ïa ki nongrim jong ka seng bad kaei ba kum ka NPP ka la leh bad angnud ban dang trei.
U Bah Prestone ha kane ka sngi u la kyrpad na ki paidbah ba kin ai ka jingkyrshan kaba pura ïa ka Kong Rona Khymdeit kaba dei ka kyrtong ka NPP ban ïakhun ïa ka ilekshon MDC na Nongpoh konstitwensi.
U Bah Prestone haba ai jingkren u la ong ba don ki seng saiñpyrthei bapher bapher kiba ong kwah beit da ki briew ba thymmai, hana ba ym treh da ki briew ba la don lypa ha ka politik, kiba la don ha ki kam shnong ruh ym long, hana kwah kiba dang thymmai, bym pat don dak sniew ne jingbakla. U la ong haba u pyrkhat marwei ïa ka jingkren jong kita ki seng, shem ba kam dei, balei kam dei, ka daw ka long ba ha kano kano ka kam, la ha ki kam ïing, kam kur, kam shnong, kam jaidbynriew, ka synshar-khadar, donkam ïa ki briew ba shemphang, u briew bym don jingtip ne shemphang u lah ban ïalam bakla ïa ki paidbah bad wat ban ïalam sha khlaw, lada ym jied ïa u Rangbah shnong ba tbit, lah ban sah dum ka shnong ka thaw.
U Bah Prestone u la ong ba ka Kong Rona Khymdeit ka dei ka briew kaba la bit bad biang bha bad ruh kaba la don jingtip bha halor ki kam ba ïadei bad ka district council, naba ka la long teng ka MDC.
“Nga kynmaw ha ka ilekshon 2023, ka Kong Macdalyne ka la ju ïalap bha ïa ka kyrteng ka shnong Marmain. Wat la ngam shym la poi ha kito ki por, hynrei ngi la lah ban pyndep bun ki jingdonkam, bad mynta ka kynti ruh ka roi ka par kan tuid lada phi ki paidbah phin pynjop ïa ka Kong Rona, bad ngin pynthikna ba ka Sorkar kan phai khmat sha ka thaiñ Marmain,” la ong u Bah Prestone.
U la ong, “Ha kine ki sngi kin sa wan ki seng ki jait pa ki jait, ki ban wan khroh wan kjor bad kin ong jied tang ïa u ba bha tam, nga pat ngam ong, na ka bynta ka ilekshon MDC, ngi na ka seng, ngi ai tiket Kong Rona, ka dei ka longkmie kaba sngewthuh bha rympei ïing lajong, ka dei ka longkmie kaba sngewthuh bha ïa ka jingdonkam jong ki paidbah bad ka briew kaba la biang bha ha ka jingtip jingshemphang. Kumta kat ka kam bah kam san ba ïadei bad ka shna aiñ ha Council donkam briew ba shemphang, ym dei ban ïa peit paralok, ne ïa u briew ba sngew tynnad.”
“Kin sa wan ki briew ban sa kynnoh da kumne-kumtai, sngewbha ïai neh skhem ha ka Kong Rona,” ong utei u Nongïalam ka NPP bad bynrap ba ka NPP naduh u snem 2018 ka la ñiah ïa ka bos bad la lah ban ïalam ha ka rukom kaba biang bad paka hynrei ha u 2023, ka jingshah kynther ka bym long shuh ban ïakren, tang ban sngap kyrteng NPP ruh la tieng, ha kaba don kiba la mih noh na ka NPP ba hana u paidbah um pdiang shuh ïa ka seng, hynrei ngi ïeng ha ka nongrim kaba skhem, phi lah ban beiñ ïa u hynrei phim lah ban rat, katba phi nang kren beiñ katta ki jingkyrkhu kin nang wan, ka roi ka par kin nang wan.”
“Haba ngi shimti ban ïalam ïa ka Sorkar, la shu kynnoh ba la shu tuh lut, ngi la shu shah kren, ha kaba la don ki jingkren ba sngewtynnad ban pynshongshit tang na sla jong ka jabieng, jingshisha ki briew kiba nang ban kdew kti tang ïa kiwei ki bym ïohi shuh ïa lade, yn ong u briew ruh ym dei u mrad ruh ym dei. Kum u briew ngim biang lut, hynrei ban ong ba biang lut ka long ba phi shet shukor ïa lade. Nga kyrpad ïa ki paidbah to ïa bishar bniah, da pynshong nongrim, kane ka ilekshon MDC ka dei kaba donkam tam,” u la ong.
