Shillong, Rymphang 05
Ka Meghalaya ka la khur kawei ka takma rupa lem bad ar tylli ki takma rnong ha ka 38th National Games kaba la long ha Uttarakhand ha ka Sngi Balang.
Kane ka la wan urlong lyngba na uwei pat u nongking lieng ba dang 15 snem ka rta, u Indra Sharma ha ka Men Canoe Slalom lem, katba ïa ki ar tylli ki takma rnong la khur da ka Kiran Devi bad ka H. Anandhi ha ka Women Double Scull Competition.
Kane ka la wan hadien ba uwei na ki nongking lieng na Lawbyrwa kaba ha Sumer, Ri Bhoi District, u Pynshngaiñ Kurbah uba la khur ïa ka takma rnong ha ka jingïakob king-lieng kynda (Canoe Men Slalom) ha ka Sngi Ba-ar.
Kine baroh ki takma ki la wan lyngba ki nongking-lieng ha ki wah kiba long lat-lat bad kiba kham eh bha ban king bad ban pynphai ïa ki lieng jong ki.
Kaba kham sngewtynnad hangne ka long ba u Indra Sharma u dei khynnah ba dang shong klas-X na ka shnong Umtham, kaba ha Ri Bhoi District bad un pyndep ruh ïa ka eksamin Secondary School Leaving Certificate (SSLC). Wat la um shym la ïoh ban pynkhreh pura ïa ka eksamin jong u, hynrei la ïathuh ba un mih na Uttarakhand ha ka 7 tarik ban wanphai sha la ïing bad ha ka 10 tarik mynta u bnai pat un hap ban pynkhreh sa ïa ka eksamin SSLC.
Na ka liang ka Meghalaya State Olympic Association (MSOA) ka la ai khublei kyrpang ïa ki shikurim kata u Ian Stuart Vincent bad ka Sheila Vincent kiba la trei shitom ban kyntiew ïa kane ka jingïalehkai kaba dang thymai ha kane ka Jylla.
Kitei shikurim ki dei ki nongseng ïa ka Meghalaya Canoe Association bad tang hapoh ki ar snem naduh ba la seng ïa ka ha u snem 2023, ki la lah ban sei ïa ki nongking-lieng kiba kynsai lyngba ka jingpynlong ïa ki jingïakob king-lieng ha Umtham, Ri Bhoi District.
