Shillong, Rymphang 06
Ka lympung ïalehkai 4th District League T20 Cricket Tournament 2024 ba la pynïaid da ka East Khasi Hills Cricket Association ka la nangjam shaphrang ha kaba ka Cricket Lovers bad ka Cricket Smit ki la ïoh jingjop ha ka Sngi Palei.
Ha kane ka jingïakhun kaba long ha Saitsohpen, Sohra, ka Cricket Lovers ka la pynliem noh ïa ka Saitsohpen da 40 run. Ka Cricket Lovers kaba la shimti shwa ban tied nyngkong ka la ïoh 187 run bad shah pynkhyllem 7 wiket ha ki 20 over. U Rohit Yadav u la khyrwit ïa ka shiteng spah kaba 51 run na ki 54 bol. Katba u Ricky Surong u la shim 2 wiket ha ki 4 over.
Haba wan beh ïa ka thong, ka Saitsohpen ka la ïoh tang 146 run bad shah pynhap 9 wiket ha ki 20 over. U Banraplang Pyngrope u la tied 28 run na ki 15 bol. Katba u Mehraf Hussain Sarkar u la shim 2 wiket ha ki 4 over. Ïa ka nam ‘Player of the Match’ la ïohpdiang da u Rohit Yadav.
Haba phai sha kawei pat ka jingïakhun ba ar, ka Cricket Smit ka la jop da 5 wiket ïa ka Mawryngkneng CC. Ka Mawryngkneng kaba la kam trai ban tied nyngkong ka la ïoh 95 run bad shah pynkhyllem 10 wiket ha ki 18 over. U Damewanbiang Shadap u la tied 19 run na ki 26 bol. Katba u Shankupar Kharbangar u la shim 4 wiket ha ki 4 over.
Haba wan shimti ïa ka pali ba ar, ka Cricket Smit ka la lah ban kynjoh sha ka thong da kaba ïoh 97 run bad shah pynkhyllem 5 wiket ha ki 17.5 over. U Elbenroy Mawthoh u la tied 45 run na ki 44 bol. Katba u Rahnam Nongspung u la shim 2 wiket ha ki 4 over. Ïa ka nam ‘Player of the Match’ la ïohpdiang da u Elbenroy Mawthoh.
